ភ្នំពេញ៖ ជនសង្ស័យមួយក្រុមធ្វើសកម្មភាពឆក់យកកាបូបស្ពាយពីកម្មការិនីរោងចក្រម្នាក់ បានសម្រេចហើយនាំគ្នាជិះគេចខ្លួនដោយសុវត្ថិភាពបង្កការភ្ញាក់ផ្អើលកើតឡើង នៅព្រឹកថ្ងៃទី១៥ ខែកក្កដា ឆ្នាំ២០២១ ស្ថិតលើស្ពាន អាកាសផ្សារដីហុយ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ប្រភពពីកន្លែងកើតហេតុបានឲ្យដឹងថា ស្ត្រីរងគ្រោះខាងលើនេះមានឈ្មោះ អ៊ុក ស្រីស្រស់ អាយុ២៧ឆ្នាំ មុខរបរកម្មការិនីរោងចក្រ បានរងរបួសបញ្ជូនទៅសង្រ្គោះនៅមន្ទីរពេទ្យភ្លាមៗ ជិះម៉ូតូម៉ាក ហុងដាឃ្លីច ពណ៌ក្រហម ពាក់ស្លាកលែខ ភ្នំពេញ 1HK-4582 ។ ចំពោះសម្ភារៈដែលបាត់បង់ក្នុងកាបូបរួមមាន ទូរស័ព្ទអាយហ្វូន11Pro មួយគ្រឿង លុយ៨ម៉ឺនរៀល និង៣០ដុល្លារ ។
នារីរងគ្រោះខាងលើនេះបានឲ្យដឹងថា នៅមុនពេលកើតហេតុ ជនរងគ្រោះបានធ្វើដំណើរចេញទៅធ្វើការ បើកបរក្នុងទិសដៅពីកើតទៅលិច ឡើងស្ពានអាកាសផ្សារដីហុយ ។ លុះមកដល់ចំណុចកើតហេតុ ស្រាប់តែមានជនសង្ស័យជិះម៉ូតូដែលមិនត្រូវបានគេចាំភិនភាគ និងមានគ្នាប៉ុន្មាននាក់នោះទេដោយសារនារីរងគ្រោះភិតភ័យខ្លាំងមិនបានចាប់អារម្មណ៍នឹងពួកគេ ។ បន្ទាប់មកក្រុមជនសង្ស័យ បានធ្វើសកម្មភាពឆក់កាបូបរបស់នាងដែលស្ពាយចំហៀងបានសម្រេចហើយ គេចខ្លួនបាត់តែម្តង ។
ភ្លាមៗនោះបន្ទាប់ពីកើតហេតុបានរាយការណ៍ជូនសមត្ថកិច្ចមូលដ្ឋាន និងរាយការណ៍ជូនផ្នែកជំនាញដើម្បីចុះមកពិនិត្យនៅកន្លែងកើតហេតុដោយផ្ទាល់ ។ ចំណែកជនរងគ្រោះត្រូវដឹកបញ្ជូនទៅសង្រ្គោះ នៅមន្ទីរពេទ្យភ្លាមៗ ៕
