ភ្នំពេញ៖ ជនសង្ស័យមានគ្នា២នាក់ ជិះម៉ូតូទ្រីមសង់ មួយគ្រឿង បានធ្វើសកម្មភាពឆក់កាបូបពីនារីវ័យក្មេងម្នាក់ត្រូវបានបានសម្រេច រួចជិះរត់គេចខ្លួនបាត់ស្រមោល បង្កការភ្ញាក់ផ្អើលកាលពីវេលាម៉ោង៨ និង៤០នាទីយប់ថ្ងៃទី៧ ខែកក្កដា ឆ្នាំ២០២១ ស្ថិតនៅតាមបណ្តោយផ្លូវ២១៧ ចំណុចគល់ស្ពានអាកាសស្ទឹងមានជ័យ ក្នុងសង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ។
ប្រជាពលរដ្ឋនៅកន្លែងកើតហេតុបានឲ្យដឹងថា ដោយរូបគាត់ បានជិះម៉ូតូម៉ាក ធូដេ មួយគ្រឿងពណ៌ទឹកមាស ពាក់ផ្លាកលេខ ភ្នំពេញ1-BW 9822 ធ្វើដំណើរចេញពីចំការដូង តាមបណ្តោយផ្លូវ២១៧ ក្នុងទិសដៅពីលិចមកកើត ខណៈមកដល់ចំណុចកើតហេតុ ជាប់នឹងគល់ស្ពានអាកាសស្ទឹងមានជ័យ ស្រាប់តែលេចមុខជនសង្ស័យ មានគ្នា២នាក់ ជិះម៉ូតូម៉ាកទ្រីមសង់មួយគ្រឿង មិនចាំផ្លាកលេខ និងមានគ្នាជិះបិតគូទម៉ូតូ១គ្រឿងទៀត ពីក្រោយ មកឆក់យកកាបូបរបស់គាត់ ដាក់នៅក្បាលម៉ូតូ បានសម្រេច រួចជិះរត់គេចខ្លួនបាត់ស្រមោល ដោយមិនរំខានសមត្ថកិច្ច ។
ភ្លាមៗនោះនារីរងគ្រោះខាងលើនេះ បានជិះម៉ូតូយំស្រែក ស្លន់ស្លោមកកន្លែងគោលដៅចរាចរណ៍ប្រចាំការ នៅក្រោមស្ពានអាកាសស្ទឹងមានជ័យ សុំឲ្យសមត្ថកិច្ចជួយ បន្ទាប់មកក៏បានអ្នកសារព័ត៌មាន ជូនរូបនាងទៅដាក់ពាក្យបណ្តឹង នៅប៉ុស្តិ៍នគរបាលរដ្ឋបាលសង្កាត់ស្ទឹងមានជ័យទី២ ដើម្បីដាក់ពាក្យបណ្តឹងឲ្យតាមស្រាវជ្រាវរកជនសង្ស័យមកផ្ទន្ទាទោសតាមនីតិវិធី ៕
