អាមេរិក៖ សាច់ញាតិគ្រួសាររបស់អ្នកដែលរស់នៅក្នុងអគារកម្ពស់១២ជាន់ដែលបានរលំបាក់ ស្រុត នៅថ្ងៃទី២៤ ខែមិថុនា ឆ្នាំ២០២១ ក្នុងទីក្រុងម៉ៃអាមី រដ្ឋផ្លរីដា សហរដ្ឋអាមេរិក មានអារម្មណ៍ក្ដុកក្ដួលយ៉ាងខ្លាំងដែលពេលនេះកំពុងតែរងចាំទទួលដំណឹងសាច់ញាតិពួកគេដែលបានបាត់ខ្លួនក្នុងគំនរ អគារនេះ ខណៈគេប្រទះឃើញអ្នកស្លាប់ម្នាក់ក្នុងចំណោម៩៩នាក់ដែលបាត់ខ្លួន ។
បន្ទាប់ពីករណីដ៏រន្ធត់នេះបានកើតឡើងអ្នកដែលបានរស់រានមានជីវិត កំពុងស្វែងរកទីតាំងសម្រាប់ស្នាក់នៅថ្មី ដោយសារតែពេលនេះពួកគេក្លាយជាអ្នកគ្មានទីលំនៅ ។ ជាមួយគ្នានេះអ្នកមួយចំនួនបាន អះអាងថា ខ្លួនបាត់បង់អស់បណ្ដាឯកសារលិខិតស្នាម បាត់បង់អស់សម្លៀកបំពាក់ ព្រមទាំងប្រាក់កាសជាដើម ។
ដោយឡែកក្រុមអ្នកជួយសង្គ្រោះរួមទាំងកងកម្លាំងប៉ូលិស និងកងឯកភាពដទៃៗទៀត កំពុងតែរើកកាយគំនរបាក់បែក តាមរកបណ្ដាអ្នកនៅរស់រានមានជីវិត។ បណ្ដាគ្រឿងចក្របានកាយ និងស្ទូចផ្ទាំងបេតុងចេញ ហើយឧទ្ធម្ភាគចក្របានហោះក្រឡឹងពីលើ។ ក្រៅពីអគារកម្ពស់១២ជាន់នោះ ដែលបាក់ អគារដទៃៗទៀតពុំរងការប៉ះពាល់ឡើយ គ្រាន់តែបាក់ធ្លាក់ផ្នែកមួយចំនួននៃជញ្ជាំង តែប្រជាជនត្រូវបានជម្លៀសចេញ ជាវិធានការសន្តិសុខ ហើយវិថីមួយចំនួន នៃសង្កាត់មានអគារបាក់ត្រូវបិទខ្ទប់មិនឲ្យធ្វើចរាចរណ៍។
បើទោះបីយ៉ាងណាក្តីប្រមុខប៉ូលិសក្រុងម៉ៃអាមីម្នាក់អះអាងថា មនុស្ស៥៣នាក់ត្រូវបានរកឃើញ ប៉ុន្តែនៅរស់តែ៩៩នាក់ទៀតបានបាត់ខ្លួន។ ក្នុងចំណោមអ្នកបាត់ខ្លួន គឺមានជនជាតិអាមេរិក ដើមកំណើតអាមេរិកឡាទីនប្រមាណ២០នាក់។ មូលហេតុនៃការបាក់អគារនេះនៅមិនទាន់អាចកំណត់ដឹងនៅឡើយ។ អគារស្នាក់នៅនេះ កសាងតាំងពីំឆ្នាំ១៩៨១មក ហើយដំបូលកំពុងតែជួសជុលចាប់តាំងពីជាង១ខែមកហើយ ៕
