ភ្នំពេញ៖ បុរសជនជាតិចិនម្នាក់ភ័យលួសព្រលឹងចុងសក់ ដោយសារបើករថយន្តលឿនមិនប្រយ័ត្នបានរេចង្កូតធ្លាក់ចូលក្នុងច្រាំងទន្លេក្រោមស្ពានជ្រោយចង្វាតែសំណាងល្អមានដីធំៗកល់ជាប់មិនបណ្តាលឲ្យរថយន្តធ្លាក់ចូលទៅក្នុងទន្លេ កាលពីម៉ោងជាង២រំលងអធ្រាត្រឈានចូលថ្ងៃទី៧ខែមិថុនា ឆ្នាំ២០២១ ស្ថិតនៅតាមបណ្ដោយផ្លូវបេតុងសង្កាត់ ជ្រោយចង្វាខណ្ឌ ជ្រោយចង្វារាជធានី ភ្នំពេញ ។
ប្រភពពីកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាកតូយ៉ូតាព្រូស ពណ៌ផ្ទៃមេឃពាក់ស្លាកលេខភ្នំពេញ 2AP-4985 បើកបរដោយបុរសជនជាតិចិនម្នាក់ធ្វើដំណើរតាមបណ្តោយផ្លូវបេតុងក្រោមស្ពានជ្រោយចង្វាក្នុងទិសដៅពីកើតមកលិចក្នុង ល្បឿនលឿនមិនប្រយ័ត្នបានរេចង្កូតធ្លាក់ចូលក្នុងច្រាំងទន្លេចំណុចក្រោមស្ពានជ្រោយចង្វា។ ភ្លាមនោះបុរសជាជនជាតិចិនបានបើកទ្វារចេញពីក្នុងរថយន្តឡើងមកគោកវិញ ។
ក្រោយពីហេតុការណ៍នេះកើតឡើង សមត្ថកិច្ចមូលដ្ឋានបានចុះមកដល់ ដោយពិនិត្យជុំវិញកន្លែងកើតហេតុ មិនប៉ះពាល់ដល់ទ្រព្យសម្បត្តិរដ្ឋក៏ឲ្យម្ចាស់ស្ទូចរថយន្តយកទៅជួសជុលដោយខ្លួនឯង ៕
