ក្រុមកងយោធពលខេមរភូមិន្ទ ប្រជែងបាន៣ពិន្ទុពីខេត្តព្រៃវែង ថ្ងៃបើកឆាក ពានរង្វាន់លីគខាប់

កីឡាជាតិ៖ ក្រុមកងយោធពលខេមរភូមិន្ទ (ទ័ព) ប្រជែងបាន៣ពិន្ទុយ៉ាងតឹងតែងបំផុតពីក្រុមម្ចាស់ផ្ទះខេត្តព្រវែង ដោយលទ្ធផល ១ទល់០ នៅក្នុងការប្រកួតបើកឆាកក្នុងពូល B ពានរង្វាន់លីគខាប់ រដូវកាល ២០២១ កាលពីល្ងាចថ្ងៃទី៦ ខែមិថុនា ឆ្នាំ២០២១។
១គ្រាប់ជ័យជម្នះរបស់ក្រុមទ័ពធ្វើសម្រេចដោយកីឡាករ Yuta Kikuchi នៅនាទី៨៩។ ក្រុមទ័ពរកបាន៣ពិន្ទុ នៅក្នុងការប្រកួតដំបូងរបស់ខ្លួន នៅក្នុងពូល B។ ចំពោះមួយប្រកួតផ្សេងទៀត នៅក្នុងពូល A កាលពីថ្ងៃទី៥ ខែមិថុនា ឆ្នាំ២០២១ ក្រុមភ្នំពេញក្រោនក៏ស្វែងរកបាន៣ពិន្ទុដោយងាយពីក្រុមក្នុងក្របខ័ណ្ឌលីគលំដាប់ទី២ ក្រុមអាយអេសអាយដង្កោសែនជ័យ ដោយលទ្ធផល ៥ទល់០។
នេះជា២ប្រកួតបើកឆាកនៃពូលទាំងពីរ នៃព្រឹត្តិការណ៍ពានរង្វាន់លីគខាប់ ដែលដំណើរការពីថ្ងៃទី៥ដល់ថ្ងៃទី២៧ ខែមិថុនា ឆ្នាំ២០២១ ដោយមាន៨ក្រុមចូលរួម ក្នុងឱកាសសម្រាកការប្រកួតលីកកំពូលកម្ពុជា ជាង១ខែ ដោយសារតែក្រុមជម្រើសជាតិកម្ពុជាកំពុងបំពេញបេសកកម្ម៣ប្រកួតចុងក្រោយ នៅក្នុងពូលC ជុំទី២នៃព្រឹត្តិការណ៍ បាល់ទាត់ពិភពលោក នៅប្រទេសកាតា ឆ្នាំ២០២២ (FIFA World Cup Qatar 2022)។
ជាមួយគ្នានោះ ២ប្រកួតដែលគ្រោងលេង កាលពីថ្ងៃទី៥-៦ ខែមិថុនា ឆ្នាំ២០២១ ត្រូវបានលុបចោល ដែលជាការប៉ះគ្នារវាង ព្រះខ័នរាជស្វាយរៀង និងយុវជនបាទីអាយុក្រោម១៨ឆ្នាំ និង១ប្រកួតទៀត គឺបឹងកេតប៉ះជាមួយវិសាខា៕