ភ្នំពេញ៖ បុរសម្នាក់បើករថយន្តសេរីទំនើបមួយគ្រឿងឆ្លងកាត់ផ្លូវត្រូវបានយុវជនពីនាក់ជិះម៉ូតូមកបុកចំផ្នែកចំហៀងខាងស្ដាំបណ្ដាលឱ្យរងការខូចខាតបន្តិចបន្តួចចំណែកម៉ូតូខ្ទេចអស់មួយកំណាត់មុខសំណាងល្អយុវជនទាំងពីរបានរងរបួសស្រាល កាលពីវេលាម៉ោង១១នឹង១០នាទី ថ្ងៃទី២៦ ខែឧសភា ឆ្នាំ២០២១ តាមវិថីព្រះអង្គឌួងផ្លូវលេខ១១០ កែងនឹងវិថីកាល់ម៉ែតលេខ៥៣ ស្ថិតក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
បើតាមប្រជាពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុនេះបានកើតឡើងបានឃើញយុវជនពីនាក់ជិះម៉ូតូម៉ាកឌ្រីមសង់សេរីឆ្នាំ២០២១ពណ៍ខ្មៅមួយគ្រឿងពាក់ស្លាក់លេខសៀមរាប1AJ-4201 ជិះឌុបគ្នាពីរនាក់ធ្វើដំណើរក្នុងទិសដៅពីកើតទៅលិចតាមបណ្ដោយផ្លូវលេខ១១០ ក្នុងល្បឿនលឿនគួរសម ខណៈពេលមកដល់ត្រង់ចំណុចផ្លូវបំបែកជា៤ កែងនឹងផ្លូវ៥៣ ក៏បានអកហ្សឺជាមួយនឹងរថយន្តលុចសុីសសេរីទំនើបពណ៍ខ្មៅមួយគ្រឿងម៉ាកLX570 ពាក់ស្លាកលេខ ភ្នំពេញ2BC-8888 បើកបរតាមផ្លូវលេខ៥៣ពីត្បូងមកជើងក្នុងទិសដៅបញ្រ្ចាសគ្នា ក៍បានជ្រុលទៅបុកពេញទំហឹងបណ្ដាលឲ្យភាគីខាងម៉ូតូរងការខូចខាតអស់មួយកំណាត់មុខយ៉ាងដំណំ ចំណែកម្ចាស់ម៉ូតូបានរងរបួសស្រាល។
ក្រោយកើតហេតុសមត្ថកិច្ចមូលដ្ឋានក៏បានចុះមកដល់ហើយធ្វើការវាស់វែងនឹងលើកម៉ូតូដែលបានរងការខូចខាតទៅទុកនៅចិញ្ចឹមផ្លូវដើម្បីឲ្យភាគីទាំងពីរធ្វើការចរចាគ្នាសងជាសំណងដើម្បីបញ្ចប់រឿង៕
