កណ្ដាល៖ ក្រោយទទួលបានព័ត៌មានពីប្រជាពលរដ្ឋ និងទទួលបានបទបញ្ជា ពីលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល និងមានការសម្របសម្រួល ដោយឯកឧត្តម លាវ ស្រេង ព្រះរាជអាជ្ញានៃអយ្យការអមសាលាដំបូងខេត្តកណ្តាល និងមានការចូលរួមពី លោកនាយករដ្ឋបាលសាលាស្រុក លោកមេឃុំ លោកនាយប៉ុស្តិ៍រដ្ឋបាល លោកមេភូមិ កម្លាំងសមត្ថកិច្ចសំរោងលើ បានបើកប្រតិបត្តិការបង្ក្រាបករណីប្រើប្រាស់អាវុធខុសច្បាប់ និងជួញដូរដោយខុសច្បាប់ នូវសារធាតុញៀននៅចំណុចផ្ទះជនសង្ស័យឈ្មោះ ពែល មី នៅភូមិត្រពាំងកក់ ឃុំសំរោងលើ ស្រុកអង្គស្នួល ខេត្តកណ្តាល កាលពីថ្ងៃទី១៦ ខែមេសា ឆ្នាំ២០២១ ។
ប្រភពពីសមត្ថកិច្ចបានឲ្យដឹងថា ក្នុងប្រតិបត្តិការនេះសមត្ថកិច្ចបានឃាត់ខ្លួនស្ត្រីម្នាក់ ឈ្មោះសាឡយ វិច្ឆិកា អាយុ១៦ឆ្នាំ ជនជាតិខ្មែរ មុខរបរ កសិករ ទីលំនៅ បច្ចុប្បន្ននៅភូមិត្រពាំងត្បែង ឃុំសំរោងលើ ស្រុកអង្គស្នួល ខេត្តកណ្តាល (ជួញដូរគ្រឿងញៀន) ។ ចំណែកបក្សពួកចំនួនបីនាក់ផ្សេងទៀតបានរត់គេចខ្លួន ក្នុងនោះរួមមាន៖ ឈ្មោះ ពែល មី ភេទប្រុស អាយុ ២០ឆ្នាំ ជនជាតិខ្មែរ នៅភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរ មិនពិតប្រាកដ (មេខ្លោង) (កាន់កាប់អាវុធម៉ាក Ak ស្វាយបត់ចំហៀង០១ដើម លេខ1744 ផលិតឆ្នាំ១៩៦៧ (បង់១ គ្រាប់២៧គ្រាប់) ។ ឈ្មោះ ធីម ឌឿន (ហៅពែក) ភេទប្រុស អាយុ ២១ឆ្នាំ ជនជាតិខ្មែរ មានទីលំនៅភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរ មិនពិតប្រាកដ (មេខ្លោង) កាន់កាប់អាវុធម៉ាក AK កាត់ស្វាយ០១ដើម (គ្មានស្វាយ) គ្មានលេខ បង់០១ គ្រាប់៣០គ្រាប់ និងអាវុធខ្លីម៉ាក ប្រាស់ហា ចំនួន០១ដើម លេខ Z518368 បង់ចំនួន០១ គ្រាប់០៦គ្រាប់ និង ស្រោមចំនួន០១ ។ ឈ្មោះ ធីម ឌឿន (ហៅពែក) មានដីកាបង្គាប់ឱ្យចាប់ខ្លួនចំនួន០៥ ពីបទជួញដូរដោយខុសច្បាប់នូវសារធាតុញៀន ។ ឈ្មោះ សល់ រស្មី ភេទប្រុស អាយុ ២១ ឆ្នាំ ជនជាតិខ្មែរ មានទីលំនៅភូមិត្រពាំងត្បែង ឃុំសំរោងលើ ស្រុកអង្គស្នួល មុខរបរ មិនពិតប្រាកដ (គេចខ្លួន) ។
សមត្ថកិច្ចបានដកហូតវត្ថុតាងរួមមាន អាវុធម៉ាក Ak ០១ដើម ស្វាយបត់ចំហៀង០១ដើម លេខ1744 ផលិតឆ្នាំ១៩៦៧(បង់១ គ្រាប់២៧គ្រាប់) ។ អាវុធម៉ាកAK កាត់ស្វាយ០១ដើម (គ្មានស្វាយ) គ្មានលេខ បង់០១ គ្រាប់៣០គ្រាប់ ។ អាវុធខ្លីម៉ាក ប្រាស់ហា ចំនួន០១ដើម លេខZ518368 បង់ចំនួន០១ គ្រាប់០៦គ្រាប់ និង ស្រោមចំនួន០១ ។ អាវុធច្នៃប្រើខ្យល់ បាញ់គ្រាប់កង់ចំនួន០៣ដើម ដាវ០១ដើម ពូថៅដៃដងឈើ០១ កាំបិតប៉័ងតោ០១ និងកន្ត្រៃ០១ ។ ថ្នាំញៀនម៉ាទឹកកក១កញ្ចប់ធំ ,ថ្នាំញៀន WY០២គ្រាប់ និងឧបករណ៍ប្រើប្រាស់វេចខ្ចប់ថ្នាំញៀនមួយចំនួន ។
សូមជម្រាបថា ក្រោយឃាត់ខ្លួន ឈ្មោះសាឡយ វិច្ឆិកា សមត្ថកិច្ចបានបញ្ជូនមកកាន់អធិការដ្ឋាននគរបាលស្រុក ដើម្បីសួរនាំ តាមបញ្ជារបស់ឯកឧត្តមព្រះរាជអាជ្ញា ។ នៅចំពោះមុខសមត្ថកិច្ចជនសង្ស័យ បានឆ្លើយថាខ្លួនជាអ្នកលក់ថ្នាំញៀន ចំណែកអាវុធខាងលើនេះត្រូវបានឈ្មោះ ពែល មី យកមកលាក់ទុកក្នុងផ្ទះខ្លួន នៅព្រឹកថ្ងៃទី១៦ ខែមេសា ២០២១ វេលាម៉ោងប្រហែល៥ព្រឹក ។ បច្ចុប្បន្ន វត្ថុតាងត្រូវបាននាំយកមកកាន់ អធិការដ្ឋាននគរបាលស្រុក និងសាងសំណុំរឿងតាមនីតិវិធី ៕
