ភ្នំពេញ ៖ បន្ទាប់ពី អតីតភរិយា លោកឧកញ៉ា ឌួង ឆាយ បានបញ្ចេញ វីដេអូរ ហិង្សា កាលពីយប់មិញមក និងធ្វើអោយអ្នកលេងក្នុងបណ្តាញសង្គមជាច្រើនផ្ទុះការរិះគន់ យ៉ាងខ្លាំង ធ្វើអោយលោកឧកញ៉ា ដួង ឆាយ ចេញមុខឡាយវីដេអូរ បកស្រាយ ទាំងព្រឹក ដែលមានមើលរហូតដល់ទៅជាង១លានដង។ ក្នុងនោះដែរក៏នៅតែមានមតិរិះ យ៉ាងចាស់ដៃ ទៅលើ ទង្វើរ ដ៏សាហារ ឃោឃៅ របស់ឧកញ៉ាដួង ឆាយ ទៅលើ អតីត ភរិយា ផងដែរ។
មតិរិះគន់ និងការលើកឡើងពីដំណើររឿងនៃគូជីវិត ប្តីប្រពន្ធ ពីតថភាពសង្គម ដោយគេសង្កេតឃើញ គណនីយហ្វេសបុក ឈ្មោះ ឧកញ៉ា យ៉ន សេងហាន បានសរសេរថា ៖ “បើប្រជាជនខ្ញុំ យកចិត្តទុកដាក់លើការរៀនសូត្រ តាមដានពីជីវិតគ្រួសារខ្លួនឯង តាមដានព័ត៌មានសង្គម ដូចតាមដានគ្រួសារគេបែបនេះមិនដឹងល្អយ៉ាងណាទេ! តែគួរអោយស្តាយ មិនអាចទេ!”។
ចំណែក ឯកឧត្តម ស សុខា អ្នកតំណាងរាស្រ្ត ខេត្តព្រៃវែង ក៏បញ្ចេញមតិដែរថា ៖ រួមគ្នាបំបាត់អំពើហិង្សានៅក្នុងគ្រួសារ !
យើងសង្កេតឃើញថា នៅលើពិភពលោកទាំងមូល ក៏ដូចជាប្រទេសកម្ពុជាយើង អំពើហិង្សានៅក្នុងគ្រួសារពីសំណាក់បុរសជាស្វាមី ជាឪពុក ទៅលើស្ត្រីជាភរិយា និងកូនៗ នៅតែកើតមានជាបន្តបន្ទាប់ បើទោះបីថ្នាក់ដឹកនាំប្រទេសនីមួយៗ ខិតខំបង្កើតឲ្យមានច្បាប់ និងស្ថាប័ន ឬអង្គភាពអនុវត្តច្បាប់ប្រឆាំងនឹងអំពើហិង្សាក្នុងគ្រួសារក៏ដោយ ។
អំពើហិង្សានៅក្នុងគ្រួសារ ពុំមានផលចំណេញអ្វីទាល់តែសោះ សម្រាប់ក្រុមគ្រួសារនីមួយៗ ។ ផ្ទុយទៅវិញអំពើហិង្សាក្នុងគ្រួសារនេះ មានតែបង្កឲ្យបែកបាក់គ្រួសារ ខាតបង់ទ្រព្យសម្បត្តិ បង្ករបួស និងស្លាប់បាត់បង់ជីវិតប្រពន្ធកូនតែប៉ុណ្ណោះ ។ ទីបំផុតទៅ ស្វាមីត្រូវប្រឈមនឹងផ្លូវច្បាប់ ពេលខ្លះត្រូវជាប់ពន្ធនាគារក៏មាន បន្សល់ទុកកូនកំព្រាម្តាយ និងកេរ្តិ៍អាសោចដែលមានឪពុកជាឃាតក ជាអ្នកទោសជាប់ពន្ធនាគារជាដើម។
ឯកឧត្តម ស សុខា អ្នកតំណាងរាស្រ្ត ខេត្តព្រៃវែង បន្តាថា ក្នុងនោះដែរ បុរសជាស្វាមីមួយចំនួនតូច មានការយល់ច្រឡំ គិតថា ខ្លួនជាមេគ្រួសារ ជាអ្នករកលុយផ្គត់ផ្គង់គ្រួសារ ត្រូវមានអំណាចគ្រប់គ្រងលើប្រពន្ធកូន អាចវាយធ្វើបាបប្រពន្ធកូន តាមចិត្តរបស់ខ្លួន ។ ស្វាមីខ្លះ យកលេសខ្លួនស្រវឹង ហើយក៏វាយធ្វើបាបប្រពន្ធកូន ដោយគិតថា ខ្លួនមិនមានទោសពៃឡើយ។ ចំណែកឯស្វាមីខ្លះទៀត ដើរផ្លូវខុសញៀនថ្នាំ ក៏វាយធ្វើបាបប្រពន្ធកូន ដោយគិតថា ខ្លួនវង្វេងស្មារតីមិនដឹងអី។ ស្វាមីមួយចំនួនទៀត វាយធ្វើបាបប្រពន្ធកូនជាប្រចាំ អាងតែប្រពន្ធមិនតបត មិនប្តឹង បានដៃ។
ចំពោះរាល់ការគិត ការយល់ និងការប្រព្រឹត្តអំពើហិង្សាទៅលើប្រពន្ធកូនរបស់ស្វាមីមួយចំនួនខាងលើនេះ គឺជាការយល់ច្រឡំ និងជាកំហុសឆ្គងដ៏ធ្ងន់ធ្ងរបំផុត។ លើសពីនេះទៅទៀត គ្រប់ស្វាមីដែលប្រព្រឹត្តអំពើហិង្សាទៅលើប្រពន្ធកូន សុទ្ធតែមានទោសដែលមានចែងនៅក្នុងច្បាប់ ពោលគឺស្វាមីមិនអាចប្រើអំពើហិង្សាទៅលើប្រពន្ធកូនជាដាច់ខាត ព្រោះវាអំពើខុសច្បាប់ទាំងស្រុង។
ឯកឧត្តម ស សុខា បញ្ជាក់ទៀតថា ក្នុងនាមស្វាមី និងជាឪពុកមួយរូប ខ្ញុំសូមអំពាវនាវដល់ស្វាមី និងឪពុកទាំងឡាយ សូមបញ្ឈប់រាល់ការប្រើអំពើហិង្សាទៅលើប្រពន្ធកូន ដោយប្តូរមកវិញនូវការផ្តល់ភាពកក់ក្តៅដល់ប្រពន្ធកូន និងជាបង្គោលដ៏រឹងមាំសម្រាប់ក្រុមគ្រួសារ។ រួមគ្នាបំបាត់អំពើហិង្សានៅក្នុងគ្រួសារ ដោយផ្តើមចេញពីស្វាមីគ្រប់រូប !៕
