បរទេស៖ រដ្ឋបាលរបស់ប្រធានាធិបតីសហរដ្ឋអាមេរិក លោក ចូ បៃដិន (Joe Biden) បានថ្លែងថា សហរដ្ឋអាមេរិក កំពុងតែព្យាយាមទាក់ទងជាមួយនឹងរដ្ឋាភិបាលកូរ៉េខាងជើង ចាប់តាំងពីខែកុម្ភៈ ឆ្នាំ ២០២១ ប៉ុន្តែកូរ៉េខាងជើង មិនបានឆ្លើយតប ចំពោះកិច្ចខិតខំប្រឹងប្រែងរបស់សហរដ្ឋអាមេរិក នោះឡើយ។
មន្ត្រីសហរដ្ឋអាមេរិក បានបញ្ជាក់ថា រដ្ឋាភិបាលទីក្រុងវ៉ាស៊ីនតោន បានព្យាយាមទាក់ទងជាមួយនឹងរដ្ឋាភិបាលទីក្រុងព្យុងយ៉ាង តាមគ្រប់វិធីសាស្រ្ដទាំងអស់ ដើម្បីបន្ធូរបន្ថយនូវភាពតានតឹង រវាងអាមេរិក និងកូរ៉េខាងជើង ជុំវិញបញ្ហាកម្មវិធីអាវុធមហាប្រល័យលោក និងមីស៊ីលប៉ាលេស្ទីករបស់កូរ៉េខាងជើង។ នៅក្នុងជំនួបចំនួន៣លើក រវាងតំណាងរបស់ប្រធានាធិបតីសហរដ្ឋអាមេរិក លោក ចូ បៃដិន និងលោក គីម ជុងអ៊ុន មេដឹកនាំកូរ៉េខាងជើង ទទួលបានលទ្ធផលតិចតួចបំផុត នៅក្នុងការជំរុញឲ្យកូរ៉េខាងជើង បោះបង់ចោលនូវកម្មវិធីអាវុធនុយក្លេអ៊ែររបស់ខ្លួន ដែលជាគោលបំណងដ៏សំខាន់បំផុតរបស់សហរដ្ឋអាមេរិក និងប្រទេសមហាអំណាចលោកខាងលិច។
ទោះជាយ៉ាងណា បណ្ដាញផ្សព្វផ្សាយរដ្ឋរបស់ប្រទេសកូរ៉េខាងជើង នៅមិនទាន់ទទួលស្គាល់លោក ចូ បៃដិន ជាប្រធានាធិបតីរបស់សហរដ្ឋអាមេរិកបច្ចុប្បន្ននៅឡើយ។ ដោយឡែកសហរដ្ឋអាមេរិក មានគោបំណងទាក់ទងជាមួយនឹងរដ្ឋាភិបាលទីក្រុងព្យុងយ៉ាង រួមទាំង «បណ្ដាញញូវយ៉ក តាមរយៈបេសកកម្មរបស់កូរ៉េខាងជើង ប្រចាំអង្គការសហប្រជាជាតិផងដែរ។
មន្រ្ដីរបស់សហរដ្ឋអាមេរិក បានប្រាប់ទីភ្នាក់ងារសារព័ត៌មានរ៉យទ័រថា «ការប៉ុនប៉ងជាច្រើន» ដើម្បីទាក់ទងជាមួយកូរ៉េខាងជើង ប៉ុន្តែការទាក់ទងគ្មានន័យនេះ បានចំណាយពេលជាង១២ខែកន្លងមកហើយ ដោយរាប់បញ្ចូល ទាំងឆ្នាំចុងក្រោយ នៃអាណត្ដិរបស់លោក ដូណាល់ ត្រាំ ក្នុងនាមជាប្រធានាធិបតីសហរដ្ឋអាមេរិក ផងដែរ។
លោក ចូ បៃដិន ប្រធានាធិបតីសហរដ្ឋអាមេរិក បានប្រកាសរួចហើយនូវការត្រួតពិនិត្យគោលនយោបាយលើប្រទេសកូរ៉េខាងជើង ដែលត្រូវបានគេរំពឹងថា នឹងត្រូវបង្ហាញ នៅក្នុងខែមេសា ឆ្នាំ២០២១។ លោកប្រធានាធិបតី បានហៅមេដឹកនាំកូរ៉េខាងជើង លោក គីម ជុងអ៊ុន ជាមនុស្សល្ងីល្ងើម្នាក់ ដោយបានសង្កត់ធ្ងន់លើតម្រូវការ សម្រាប់ការរំសាយអាវុធនុយក្លេអ៊ែររបស់កូរ៉េខាងជើង មុនពេលសហរដ្ឋអាមេរិក និងអង្គការសហប្រជាជាតិ បន្ថូរបន្ថនូវយទណ្ឌកម្មដ៏ធ្ងន់ធ្ងរមកលើប្រទេសផ្ដាច់ការមួយនេះ។
ដោយឡែកមេដឹកនាំកូរ៉េខាងជើង នៅតែបន្តសង្កត់ធ្ងន់ទៅលើសមត្ថភាពយោធារបស់ប្រទេសរបស់ខ្លួន ដោយអះអាងពីការអភិវឌ្ឍមីស៊ីល រយៈចម្ងាយឆ្ងាយ, ក្បាលគ្រាប់នុយក្លេអ៊ែរ, ផ្កាយរណបចារកម្ម និងនាវាមុជទឹក ដើរដោយថាមពលនុយក្លេអ៊ែរ។ ជាមួយគ្នានេះដែរ លោក គីម ជុងអ៊ុន បានអំពាវនាវឲ្យសហរដ្ឋអាមេរិក បោះបង់ចោលនូវគោលនយោបាយអរិភាពរបស់ខ្លួន មកលើកូរ៉េខាងជើង ថែមទៀងផង។
កូរ៉េខាងជើង បានបង្ហាញអំពីមហិច្ឆតារបស់ខ្លួនយ៉ាងច្បាស់ក្រឡែត នៅក្នុងដំណើរទស្សនកិច្ចរបស់លោក Anthony Blinken រដ្ឋមន្រ្ដីការបរទេស និងលោក Lloyd Austin រដ្ឋមន្រ្ដីក្រសួងការពារជាតិសហរដ្ឋអាមេរិកទៅកាន់ប្រទេសជប៉ុន និងកូរ៉េខាងត្បូអ នៅក្នុងសប្ដាហ៍នេះ៕
