ភ្នំពេញ ៖ បុរសម្នាក់បានបញ្ជារថយន្ត ព្រូស ទាំងស្រវឹង យ៉ាងលឿនជ្រុលទៅបុករះបង្គោលឡាក់បាក់ ៦ដើម ហើយជ្រុលធ្លាក់ចូលប្រឡាយ កាលពីម៉ោងជាង១២ រំលងអធ្រាត្រឈានចូលថ្ងៃអង្គារ ទី៩ ខែមិនា ឆ្នាំ២០២១ ស្ថិតតាមបណ្ដោយផ្លូវ៥០ម៉ែត្រជិតស្តុបបាគូរ ប្រមាណ២០០ម៉ែត្រ ក្នុងសង្កាត់ព្រៃសខណ្ឌដង្កោ រាជធានីភ្នំពេញ។
រថយន្តបង្កម៉ាកតូយូតាព្រូស ពណ៌ក្រហម ស៊េរីឆ្នាំ២០០៦ពាក់ផ្លាកលេខភ្នំពេញ2BD.5098បើកដោយបុរសម្នាក់ស្រវឹងស្រា។
យោងតាមប្រភពពីកន្លែងកើតហេតុបានឲ្យដឹងថាមុនពេលកើតហេតុគេឃើញបុរសម្នាក់ ស្រវឹងស្រាបើករថយន្តតូយូតាព្រូសធ្វើដំណើរតាមបណ្តោយផ្លូវ៥០ម៉ែត្រទិសដៅពីលិចទៅកើតបោះពួយក្នុងល្បឿនលឿន ខណៈមកដល់ចំណុចកើតហេតុខាងលើដោយផ្លូវងងឹតនិងស្ថានភាពផ្លូវកោងផងនោះបានជ្រុលទៅបុករះបង្គោលឡាក់បណ្ដាលឲ្យបាក់ចំនួន៦ដើមរថយន្តវិលមួយជុំធ្លាក់ចូលប្រឡាយរថយន្តរងការខូចខាតយ៉ាងដំណំ តែសំណាងល្អអ្នកបើកបរមិនមាន រងរបួសនោះទេ។
ក្រោយកើតហេតុសមត្ថកិច្ចមូលដ្ឋានចុះមកចំណុចកើតហេតុបានទាកទងជំនាញ ខណ្ឌ មកវាស់វែងយករថយន្តបង្កយករក្សាទុកនៅការិយាល័យចរាចរណ៍ខណ្ឌដង្កោរងចាំដោះស្រាយនៅពេលក្រោយ៕
