អន្តរជាតិ ៖ យោងតាមការចេញផ្សាយរបស់សារព័ត៌មាន CNA នាថ្ងៃចន្ទ ទី០៨ខែមីនា បានអោយដឹងថា រដ្ឋមន្រ្តីក្រសួងការបរទេសអូស្ត្រាលីលោកស្រី Marise Payne បាននិយាយថា អូស្រ្តាលីបានផ្អាកកម្មវិធីសហប្រតិបត្តិការការពារជាតិរបស់ខ្លួនជាមួយមីយ៉ាន់ម៉ានៅពេលដែលមានការបង្ក្រាបកាន់តែខ្លាំងឡើងដោយយោធារបស់ប្រទេសនេះលើការធ្វើបាតុកម្មទ្រង់ទ្រាយធំប្រឆាំងនឹងរដ្ឋប្រហារកាលពីខែមុន។
លោកស្រី Payne បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃអាទិត្យថា ប្រទេសអូស្ត្រាលីក៏នឹងបង្វែរសេចក្តីត្រូវការខាងមនុស្សធម៌ភ្លាមៗដល់ជនជាតិរ៉ូហ៊ីងយ៉ានិងជនជាតិភាគតិចដទៃទៀត។លោកស្រី Payne បានមានប្រសាសន៍ទៀតថាយើងនឹងផ្តល់អាទិភាពដល់តម្រូវការមនុស្សធម៌និងសេចក្ដីត្រូវការចាំបាច់បន្ទាន់នានា ហើយស្វែងរកការធានាឱ្យបាននូវការចូលរួមផ្នែកមនុស្សធម៌របស់យើងជាមួយនឹងបណ្ដាអង្គការមិនមែនរដ្ឋាភិបាលឬអង្គភាពដែលមិនពាក់ព័ន្ធនឹងរដ្ឋាភិបាល ។ ចំណងមិត្តភាព ការពារជាតិទ្វេភាគីអូស្រ្តាលីជាមួយយោធាមីយ៉ាន់ម៉ាត្រូវបានរឹតត្បិត។
លោកស្រី Payne បាននិយាយថា“ យើងបន្តទទូចដល់កងកម្លាំងសន្តិសុខមីយ៉ាន់ម៉ាឱ្យអនុវត្តការអត់ធ្មត់និងចៀសវាងអំពើហិង្សាប្រឆាំងនឹងជនស៊ីវិល”៕
