ខេត្តពោធិ៍សាត់ ៖ សមត្ថកិច្ចកិច្ចបំបែកសំណុំរឿងបានហើយ ដោយឃាត់ខ្លួន ជនដៃដល់ និងបក្សពួកបានចំនួន២នាក់ទៀត ក្នុងករណីឃាតកម្មកាប់មួយកាំបិត ដាច់កស្លាប់ម្នាក់ និងរបួសធ្ងន់ម្នាក់នៅកណ្តាលក្រុងពោធិ៍សាត់ កាលពីថ្ងៃទី១៦ ខែកុម្ភៈ ឆ្នាំ២០២១កន្លងទៅនោះ។
ប្រតិបត្តិការខាងលើនេះ ធ្វើឡើងជាបន្តបន្ទាប់គ្នាក្នុងថ្ងៃទី២ ខែមីនា ឆ្នាំ២០២១ ក្រោយទទួលបានបទបញ្ជា ពីលោកឧត្តមសេនីយ៍ទោ ស ថេង ស្នងការ នៃស្នងការដ្ឋាននគរបាលខេត្តពោធិ៍សាត់។
លោកវរសេនីយ៍ឯក យឹម ស៊ាងហៃ អធិការ នៃអធិការដ្ឋាននគរបាលក្រុងពោធិ៍សាត់ បានឱ្យដឹងថា កាលពីវេលាម៉ោង ២២៖៣០នាទីថ្ងៃទី១៦ ខែកុម្ភៈ ឆ្នាំ២០២១កន្លងទៅ នៅលើកំណាត់ផ្លូវជាតិលេខ៥ ទល់មុខគ្រឹះស្ថាន មីក្រូហិរញ្ញវត្ថុប្រាសាក់ ស្ថិតក្នុងភូមិស្ថានីយ៍ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់ មានករណីឃាតកម្មប្រព្រឹត្តដោយជនមិនស្គាល់អត្តសញ្ញាណ បានកាប់មួយកាំបិតបណ្តាលឱ្យជនរងគ្រោះឈ្មោះ ជួប សុខលី ភេទប្រុស អាយុ២៧ឆ្នាំ រស់នៅភូមិក្របៅជ្រុំ ឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់ ស្លាប់នៅនឹងកន្លែងកើត និងម្នាក់ទៀត រងរបួសធ្ងន់។
លោកអធិការបានបន្តថា ដោយបានការស្រាវជ្រាវយ៉ាងល្អិតល្អន់ ពីកម្លាំងនគរបាលព្រហ្មទណ្ឌ នៃស្នងការដ្ឋាននគរបាលខេត្ត សហការជាមួយកម្លាំងនគរបាលក្រុងពោធិ៍សាត់ និងកម្លាំងប៉ុស្តិ៍នគរបាលរដ្ឋបាល បានឈានដល់ ការឃាត់ខ្លួនជនដៃដល់ និងបក្សពួកបានចំនួន៣នាក់ កាលពីថ្ងៃទី២ ខែមីនា ឆ្នាំ២០២១ម្សិលមិញ៖
*ទី១៖ ឈ្មោះ កោះ បញ្ញា អាយុ១៨ឆ្នាំ រស់នៅភូមិក្រាំងពភ្លាក់ សង្កាត់ស្វាយអាត់ ក្រុងពោធិ៍សាត់ (ជនដៃដល់, មិនទាន់សារភាព)
*ទី២៖ ឈ្មោះ ធុជ វុទ្ធី អាយុ១៧ឆ្នាំ រស់នៅភូមិឈើទាល ឃុំត្នោតជុំ ស្រុកក្រគរ
*ទី៣៖ ឈ្មោះ សារឿន រដ្ឋា អាយុ១៩ឆ្នាំ រស់នៅភូមិស្ពានថ្ម សង្កាត់រលាប ក្រុងពោធិ៍សាត់ ខេត្តពោធិ៍សាត់។
លោកអធិការបានបន្ថែមថា ជុំវិញករណីឃាតកម្មនេះ កម្លាំងនគរបាលព្រហ្មទណ្ឌ បាននិងកំពុងធ្វើការសួរនាំជនសង្ស័យទាំង៣នាក់ខាងលើ ដោយជនសង្ស័យ២នាក់ បានឆ្លើយសារភាព ទម្លាក់លើ ជនដៃដល់ឈ្មោះ កោះ បញ្ញា តែជនដៃដល់ នៅមិនទាន់សារភាព៕
