រាជធានីភ្នំពេញ៖ ជនជាតិ២នាក់បានបើករថយន្ដបោះពួយយ៉ាងលឿន ជ្រុលចង្កូតទៅបុកគ្នាយ៉ាងពេញទំហឹង បណ្ដាលឲ្យខូចខាតទាំងសងខាង កាលពី វេលាម៉ោង១២ និង២នាទីរំលងអធ្រាត្រ ឈានចូល ថ្ងៃទី២៥ ខែសីហា ឆ្នាំ២០២០ នៅត្រង់ចំណុចផ្លូវបំបែកជា៤ ស្ថិតក្នុងសង្កាត់ស្រះចក ខណ្ឌដូនពេញ។
ប្រភពព័ត៌មាន បានឲ្យដឹងថា មុនពេលកើតមាននូវគ្រោះថ្នាក់ចរាចរណ៍នោះ គេឃើញជនជាតិចិនម្នាក់ បើករថយន្ត ម៉ាក ព្រូស ពណ៌ទឹកសមុទ្រ ពាក់ស្លាកលេខ ភ្នំពេញ 2AW-0262 យ៉ាងលឿន ក្នុងទិសដៅពីកើតទៅលិច។ ស្របពេលនោះ ក៏មានជនជាតិម្នាក់ទៀត បើករថយន្ដ ម៉ាកស្តារិក្ស ពណ៌ទឹកប្រាក់ ពាក់ស្លាកលេខ ភ្នំពេញ 2AX-0993 បោះពួយយ៉ាងលឿន ដឹកមិត្តភក្ដិចិនដូចគ្នាចំនួន៣នាក់ ក្នុងទិសដៅពីជើងទៅត្បូង។ លុះមកដល់ចំណុចកើតហេតុ ស្រាប់តែរថយន្ដនោះជ្រុលចង្កូតទៅបុករថយន្តព្រូស ចំពីក្រោយយ៉ាងពេញទំហឹង បណ្ដាលឲ្យរថយន្តស្តារិក្ស (Starex) រងការខូចខាតផ្នែកខាងមុខយ៉ាងដំណំ។ រីឯរថយន្តព្រូសវិញ រងការខូចខាតផ្នែកខាងក្រោយ តែសំណាងល្អ នៅក្នុងហេតុការណ៍នោះ មិនមានអ្នករងរបួស។
ក្រោយពេលកើតហេតុ ភាគីទាំង២បានយករថយន្ដមកអែបតាមចិញ្ចើមផ្លូវ ហើយនិយាយសម្របសម្រួលគ្នា ដើម្បីបញ្ចប់រឿង៕
