ភ្នំពេញ ៖ បុរសម្នាក់ បើករថយន្តក្រឡុកស៊ីម៉ង់ត៍ របស់ក្រុមហ៊ុន «ប៊្រីលលាន រីច (ខេមបូឌា) អិលធីឌី» បើកបត់ខ្វះការប្រុងប្រយ័ត្ន ជ្រុលទៅបុកម៉ូតូមួយគ្រឿងពីខាងក្រោយ បណ្ដាលឲ្យស្ត្រីម្នាក់ រងរបួសធ្ងន់ ត្រូវបញ្ជូនទៅមន្ទីរពេទ្យភ្លាមៗ។
ហេតុការណ៍គ្រោះថ្នាក់ចរាចរណ៍នេះ បង្កការភ្ញាក់ផ្អើលកាលពីវេលាម៉ោង១២៖៣០នាទីថ្ងៃទី៣ ខែសីហា ឆ្នាំ២០២០ ស្ថិតតាមបណ្តោយផ្លូវម៉ុងរិទ្ធី ភូមិព្រៃមូល សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញមានម៉ូតូមួយគ្រឿង ម៉ាក HOHDA FTR ពណ៍ក្រហម ពាក់ស្លាកលេខ ភ្នំពេញ 1CN-2660 បើកបរដោយបុរសម្នាក់ និងស្ត្រីម្នាក់ ជាអ្នករួមដំណើរ ក្នុងទិសដៅពីកើតទៅលិច លុះមកដល់ត្រង់ចំណុចកើតហេតុ នៅខាងមុខច្រកចូលទៅក្នុងក្រុមហ៊ុន «ប៊្រីលលាន រីច (ខេមបូឌា) អិលធីឌី» ស្រាប់តែមានរថយន្តក្រឡុកស៊ីម៉ង់ត៍របស់ក្រុមហ៊ុនខាងលើ ពណ៍ស-លាយខៀវ ពាក់ស្លាកលេខ ភ្នំពេញ 5A-1582 មួយគ្រឿង បើកបរដោយបុរសម្នាក់ មកពីខាងក្រោយ រួចបត់ស្ដាំដៃខ្វះការប្រុងប្រយ័ត្ន ជ្រុលទៅបុកនិងម៉ូតូពីក្រោយ បណ្ដាលឲ្យស្ត្រីម្នាក់ ដួលចូលទៅខាងក្រោមរថយន្ត រងរបួសធ្ងន់ ត្រូវបានបញ្ជូនទៅមន្ទីរពេទ្យភ្លាមៗ ចំណែកឯម្ចាស់រថយន្ត ក្រោយកើតហេតុរត់គេចខ្លួនបាត់ស្រម៉ោល។
ក្រោយកើតហេតុ សម្ថកិច្ចមូលដ្ឋានបានមក រួចទាក់ទងទៅសម្ថកិច្ចជំនាញចរាចរណ៍ ចុះមកធ្វើការវាស់វែងយករថយន្តបង្ក នឹងម៉ូតូជនរងគ្រោះ យកទៅរក្រាទុកនៅអធិការដ្ឋាន នគរបាលខណ្ឌសែនសុខ ដើម្បីរង់ចាំធ្វើការដោះស្រាយគ្នានៅពេលក្រោយតាមផ្លូវច្បាប់៕ ដោយ៖ និន សុភ័ស្ត
