ភ្នំពេញ ៖ កម្លាំងនគរបាល នៃអធិការដ្ឋាននគរបាលស្រុកបាទី បានធ្វើការឃាត់ខ្លួនជនសង្ស័យ៣នាក់ ក្រោយធ្វើសកម្មភាព គាស់ស័ង្កសី និងកាត់ពិដាន ចូលគាស់ផ្ទះលួចទូរស័ព្ទដៃ កាលពីវេលាម៉ោង ៣ទៀបភ្លឺ ឈានចូលថ្ងៃទី២៣ ខែកញ្ញា ឆ្នាំ២០២១ នៅចំណុចភូមិតាំងដូង ឃុំតាំងដូង ស្រុកបាទី ខេត្តតាកែវ ។សមត្ថកិច្ចបានឲ្យដឹងថា ក្រោយទទួលបានពាក្យបណ្តឹងរបស់ឈ្មោះ ផាន់ ណារ៉ូ ភេទប្រុស អាយុ៣២ឆ្នាំ កម្លាំងជំនាញរបស់អធិការដ្ឋាននគរបាលស្រុកបាទី សហការជាមួយកម្លាំងជំនាញនៃស្នងការដ្ឋាននគរបាលខេត្តតាកែវ បានធ្វើការស្រាវជ្រាវ រហូតកំណត់មុខសញ្ញាបាន សហការជាមួយកម្លាំងប៉ុស្តិ៍នគរបាលរដ្ឋបាលត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ឃាត់ខ្លួនជនសង្ស័យបាន២នាក់ រួមមាន ៖១/ឈ្មោះ ភួង វង ភេទប្រុស អាយុ២១ឆ្នាំ ២/ឈ្មោះ ឌឹម វណ្ណា ភេទប្រុស អាយុ២៥ឆ្នាំជនសង្ស័យទាំង២នាក់នេះ ស្នាក់នៅបន្ទប់ជួល ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ដកហូតបានទូរស័ព្ទដៃចំនួន ១៩ គ្រឿង ឆ្នាំងសាកចំនួន ០៥ គ្រឿង កុំព្យូទ័រ ០១ គ្រឿង។
ក្រោយមកទៀត សមត្ថកិច្ចជំនាញ បានបន្តសហការជាមួយកម្លាំងប៉ុស្តិ៍នគរបាលរដ្ឋបាលគងនយ ខណ្ឌដង្កោ រាជធានីភ្នំពេញ ឃាត់ខ្លួនបានជនសង្ស័យម្នាក់ទៀត ឈ្មោះ ផាន ឧត្តម ភេទប្រុស អាយុ២៨ឆ្នាំ ដកហូតបានទូរស័ព្ទដៃចំនួន០៥គ្រឿង។បច្ចុប្បន្ន ជនសង្ស័យខាងលើ ត្រូវបានកម្លាំងជំនាញកំពុងកសាងសំណុំរឿង ដើម្បីបញ្ជូនខ្លួនជនសង្ស័យទៅកាន់ស្នងការដ្ឋាននគរបាលខេត្តតាកែវដើម្បីចាត់វិធានការបន្ដតាមនីតិវិធីច្បាប់ ៕
