ភ្នំពេញ ៖ រថយន្តព្រុស បើកបរល្បឿនលឿនខ្វះការប្រុងប្រយ័ត្ន ជ្រុលទៅបុកពីក្រោយរថយន្តព្រុស មួយគ្រឿងទៀត ហើយរុញទៅបុកផ្ទប់ពីក្រោយរថយន្តកូរ៉េ កាលពីម៉ោង១១និង៤៥នាទីព្រឹក ថ្ងៃទី០៥ ខែមេសា ឆ្នាំ២០២១ នៅតាមផ្លូវជាតិលេខ៤ មុខផ្សារជម្ពូវ័ន សង្កាត់ចោមចៅ៣ ខណ្ឌពោធិសែនជ័យ។
តាមប្រជាពលរដ្ឋឃើញហេតុការណ៍ បានឲ្យដឹងថា មុនកើតហេតុ គេឃើញរថយន្តបង្ក ម៉ាកព្រុស ពណ៌ស ពាក់ស្លាកលេខ កំពង់ស្ពឺ 2C-1566 បើកល្បឿនលឿនពីកើតទៅលិច ដល់ចំណុចកើតហេតុ ជ្រុលបុកពីក្រោយ រថយន្តព្រុស ពណ៌ស ពាក់ស្លាកលេខ ភ្នំពេញ 2AX-6091 រុញផ្ទប់ពីក្រោយរថយន្តកូរ៉េ ពណ៌ស ពាក់ស្លាកលេខ ភ្នំពេញ 2BF-3992 បណ្តាលឲ្យរថយន្តព្រុស២គ្រឿងខូចខាតធ្ងន់ ចំណែករថយន្តកូរ៉េ ខូចខាតតែបន្តិចបន្តួច។
ក្រោយកើតហេតុ ភាគីរថយន្តទាំង៣គ្រឿង សុំធ្វើការនិយាសម្រួលគ្នា នៅចំពោះមុខនគរបាលជំនាញខណ្ឌ ទីបំផុត ត្រូវបានភាគីរថយន្តបង្ក ដឹងកំហុសរបស់ខ្លួន សុខចិត្តចេញសងថ្លៃខូចខាត ជួសជុល ទៅរថយន្តរងគ្រោះ២គ្រឿង ដើម្បីបញ្ចប់រឿងនៅកន្លែងកើតហេតុ៕
