ខេត្តកំពង់ឆ្នាំង ៖ ជម្លោះ ក្នុងគ្រួសារ លោកប្តីវ័យចំណាស់ បានទាញពូថៅ កាប់ទៅលើប្រពន្ធ ចំខ្នងដៃខាងឆ្វេងដាច់សាច់ហូរឈាម។ ករណីហិង្សាក្នុងគ្រួសារកើតឡើងនៅថ្ងៃទី១៦ ខែមីនា ឆ្នាំ២០២១ នៅចំណុចភូមិត្រពាំងម្ទេស ឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំង។
ជនសង្ស័យជាប្តី ឈ្មោះ ស សៅ អាយុ៥៩ឆ្នាំ មុខរបរកសិករ មានទីលំនៅបច្ចុប្បន្នភូមិត្រពាំងម្ទេស ឃុំស្វាយជុក ស្រុកសាមគ្គីមានជ័យ ខេត្តកំពង់ឆ្នាំង បានឈ្លោះប្រកែកជាមួយប្រពន្ធហើយក៏បានឆក់ពូថៅ កាប់ទៅលើប្រពន្ធឈ្មោះខាត់ រ៉េត អាយុ៥២ឆ្នាំ ចំខ្នងដៃខាងឆ្វេងដាច់សាច់ហូរឈាម។ មួយសន្ទុះក្រោយមកជនរងគ្រោះជាប្រពន្ធក៏បានងងឹតមុខដួល នៅហ្នឹងកន្លែងកើតហេតុ។
ក្រោយកើតហេតុ ជនរងគ្រោះត្រូវបានអ្នកភូមិដឹកយកទៅកាន់មន្ទីរពេទ្យនៅរាជធានីភ្នំពេញដើម្បីព្យាបាលបន្ត ចំណែកជនសង្ស័យត្រូវបាននគរបាលធ្វើការឃាត់ខ្លួន៕
