ដេញស្ទាក់ចាប់វាយខ្នោះ មុខសញ្ញាកាច់ក ម៉ូតូម្នាក់ ស្រុកខ្សាច់កណ្ដាល

ខេត្តកណ្ដាល៖ ករណីចាប់ខ្លួនមុខសញ្ញា”ចោរកាច់កម៉ូតូ”នេះ បានធ្វើឡើងនៅលើផ្លូវជាតិលេខ៨ ភូមិព្រៃបាំង ឃុំស៊ីធរ ស្រុកខ្សាច់កណ្ដាល ខេត្តកណ្ដាល នាថ្ងៃទី១៤ ខែវិច្ជិកា ឆ្នាំ២០២១នេះ។មុខសញ្ញាកាច់កម៉ូតូម្នាក់ត្រូវបានសមត្ថកិច្ច ស្រុកខ្សាច់កណ្ដាលសហការជាមួយកម្លាំង ប៉ុស្តិ៍នគរបាលឃុំស៊ីធរ និងកងសន្តិសុខ7NG ដេញស្ទាក់ចាប់វាយខ្នោះបាន រួមនិងម៉ូតូមួយគ្រឿងរបស់ជនរងគ្រោះផងដែរ។ជនសង្ស័យឈ្មោះ សៅ សុភ័ក្រ ភេទប្រុសអាយុ៣២ឆ្នាំ នៅភូមិព្រែកតារ័ត្ន ឃុំកំពង់ប្រាំង ស្រុកពារាំង ខេត្តព្រៃវែង។នៅមុនឈានដល់ការឃាត់ខ្លួន ជនសង្ស័យម្នាក់ កាលពីព្រឹកថ្ងៃទី១៤ ខែវិច្ជិកា២០២១។

ជនសង្ស័យបានធ្វើសកម្មភាព លួចម៉ូតូម៉ាក Scoopyពណ៌ស១គ្រឿង ពាក់ស្លាកលេខភ្នំពេញ.1IS.7125ពីឃុំព្រែកតាកូវ ស្រុកខ្សាច់កណ្ដាល ខេត្តកណ្ដាល ដែលមានម្ចាស់ឈ្មោះ ជា សម្ផស្ស ភេទស្រីអាយុ៤៥ឆ្នាំ នៅភូមិព្រែកល្វា ឃុំព្រែកតាកូវ ស្រុកខ្សាច់កណ្ដាល ខេត្តកណ្ដាល។ក្រោយលួចបានហើយ ជនសង្ស័យបានបើកម៉ូតូយ៉ាងលឿន កាត់តាមផ្លូវ ឆ្ពោះមកឡើងផ្លូវជាតិលេខ៨ បំណង ឆ្លងទៅស្រុកពារាំង ខេត្តព្រៃវែង ។សមត្ថកិច្ចនគរបាលស្រុកខ្សាច់កណ្ដាល សហការជាមួយកម្លាំងប៉ុស្តិ៍រដ្ឋបាល ស៊ីធរកណ្ដាល តាមដេញស្ទាក់រហូតឃាត់ខ្លួនបានត្រង់ចំណុចខាងលើតែម្ដងទៅ។ ជនសង្ស័យ ឈ្មោះ សៅ សុភ័ក្រ ត្រូវបានសមត្ថកិច្ចកសាងសំណុំរឿង ចាត់ការតាមនីតិវិធី៕