ខេត្តស្ទឹងត្រែង ៖ ក្នុងចំណោមអ្នកទោសចំនួន ៧នាក់ ដែលបានទម្លុះរបងពន្ធនាគារខេត្តស្ទឹងត្រែងរត់គេចខ្លួន កាលពីវេលាម៉ោងជាង ០៣ទៀបភ្លឺ ថ្ងៃទី០៨ ខែវិច្ឆិកា ឆ្នាំ២០២១នោះ នៅព្រឹកថ្ងៃទី១០ ខែវិច្ឆិកា ឆ្នាំ២០២១នេះ សមត្ថកិច្ចបានតាមប្រញាប់ស្រាវជ្រាវយ៉ាងដុតដៃដុតជើង តាមចាប់បានអ្នកទោស ចំនួន២នាក់ បានមកវិញហើយ នៅសល់អ្នកទោសចំនួន ៤នាក់ទៀតកំពុងរត់គេចខ្លួន ពេលនេះសមត្ថកិច្ចកំពុងតាមចាប់បន្ត ។
សមត្ថកិច្ចបានឲ្យដឹងថា អ្នកទោសដែលចាប់ខ្លួនបានមកវិញនេះ រួមមាន ទី១ឈ្មោះ វ៉ាន់ ភូ ភេទប្រុស ជាប់ទោស២០ឆ្នាំ រឿងបទល្មើសជួញដូរគ្រឿងញៀន ចាប់ខ្លួនបានមកវិញនៅម៉ោង១២ថ្ងៃត្រង់ថ្ងៃទី១០ ខែវិច្ឆិកានេះ នៅស្រុកថាឡាបរិវ៉ាត់ ខេត្តស្ទឹងត្រែង និងអ្នកទោសទី២ ឈ្មោះ កិត ងិន ជាប់ទោស៤ឆ្នាំ ពាក់ព័ន្ធបទល្មើសគ្រឿងញៀន ខណៈអ្នកទោស ឈ្មោះ ទូច វ៉ាត់ ដែលជាប់ទោស៣០ឆ្នាំ បទល្មើសជួញដូរគ្រឿងញៀនត្រូវចាប់ខ្លួនបានមកវិញ នៅវេលាម៉ោង០៨ និង៣០នាទី យប់ថ្ងៃទី០៩ ខែវិច្ឆិកា ឆ្នាំ២០២១ នៅចំណុចភូមិថាឡាបរិវ៉ាត់ ឃុំថាឡាបរិវ៉ាត់ ស្រុកថាឡាបរិវ៉ាត់ ខេត្តស្ទឹងត្រែង។ សរុបគឺចាប់បាន ៣នាក់ហើយ នៅសល់៤នាក់ទៀត ។
ក្នុងនោះ បើតាម ប្រធានពន្ធនាគារខេត្តស្ទឹងត្រែង បានប្រាប់សារព័ត៌មានក្នុងស្រុកឲ្យដឹងថា ចំណោមអ្នកទោសទាំង៧នាក់ ដែលរត់ចេញពីពន្ធនាគារនេះ មានម្នាក់ត្រូវបានកាត់ទោស ឲ្យជាប់ទោសអស់មួយជីវិត ករណីជួញដូរគ្រឿងញៀន ខណៈអ្នកទោស៦នាក់ទៀត ជាប់ទោសស្រាល ក្នុងករណីជួញដូរគ្រឿងញៀន និងម្នាក់ទៀត ជាប់ទោសពីបទប្លន់ ឬលួចមានស្ថានទម្ងន់ទោស។
សូមបញ្ជាក់ថា កាលពីថ្ងៃទី៨ ខែវិច្ឆិកា ឆ្នាំ២០២១ ផេក ស្នងការដ្ឋាននគរបាលខេត្តស្ទឹងត្រែង បានបង្ហោះថា សូមគោរពជម្រាបជូនសាធារណៈជន ឲ្យបានជ្រាបថា មានអ្នកទោសចំនួន ០៧នាក់ បានរត់គេចខ្លួនពីពន្ធនាគារខេត្តស្ទឹងត្រែង ។ ដូច្នេះបើបងប្អូនប្រជាពលរដ្ឋ បានប្រទះឃើញអ្នកទោស ដែលមានភិនភាគដូចរូបថតនេះ សូមសហការរាយការណ៍ មកសមត្ថកិច្ចជំនាញដើម្បីធ្វើការឃាត់ខ្លួន។ក្នុងនោះសមត្ថកិច្ចក៏បានប្រកាសលេខទូរសព្ទជាច្រើនខ្សែផងដែរ ដើម្បីឲ្យពលរដ្ឋរាយការណ៍ តាមរយ:ទូរស័ព្ទទំនាក់ទំនង :☎️- 088 834 5627☎️- 031 999 9491☎️- អធិការនគរបាលក្រុងស្ទឹងត្រែង 097 822 5555
☎️- អធិការនគរបាលស្រុកថាឡាបរិវ៉ាត់ 088 311 4007☎️- អធិការនគរបាលស្រុកសៀមបូក 031 977 8496☎️- អធិការនគរបាលស្រុកសេសាន 088 647 6999☎️- អធិការនគរបាលស្រុកសៀមប៉ាង 088 388 8856☎️- អធិការនគរបាលស្រុកបុរីអូរស្វាយសែនជ័យ 097 9999 940 ៕
