ខេត្តកណ្ដាល៖ នាព្រឹកថ្ងៃទី១៥ ខែតុលា ឆ្នាំ២០២១ នៅចំនុចស្ថិតនៅភូមិអំពិលទឹក ឃុំសំបួរមាស ស្រុកមុខកំពូលខេត្តកណ្ដាលប្រជាពលរដ្ឋបានប្រទះឃើញសពបុរសម្នាក់ដែលត្រូវបានឃាតករចាក់សម្លាប់ជាច្រើនកាំបិតរួចបានយកសពមកទម្លាក់ចោលក្រោមដើមត្នោតខណៈសមត្ថកិច្ចបានការសង្ស័យជាបឋមថា គឺជាករណីឃាតកម្ម។ប្រជាពលរដ្ឋនៅកន្លែងកើតហេតុ បានប្រាប់ឲ្យដឹងថា កាលពីថ្ងៃទី១៤ ខែតុលា ឆ្នាំ២០២១ ថា ពួកគាត់ធ្វើដំណើរឆ្លងកាត់ទីនោះបានប្រទះឃើញសពបុរសម្នាក់អង្គុយអោនមុខចុះក្នុងស្ថានភាពឈាមជាប់អាវ និង មានស្នាមចាក់ជាច្រើនកន្លែង ផងដែរ ទើបពួកគាត់រាយការណ៍ជូនសមត្ថកិច្ចប៉ុស្តិ៍តែម្តង ។
ក្រោយមានហេតុការណ៍នេះកើតឡើង កម្លាំងនគរបាលខេត្តកណ្ដាល និង នគរបាលស្រុកមុខកំពូល បានចុះពិនិត្យដល់កន្លែងទើបដឹងថា ជនរងគ្រោះជាជនជាតិវៀតណាម មានឈ្មោះ ង្វៀង ដាំងជុង ភេទប្រុស អាយុ៤០ឆ្នាំ ជនជាតិវៀតណាម មានទីលំនៅឃុំព្រែកខ្សាយ «ខ» ស្រុកពាមរក៍ ខេត្តព្រៃវែង ។ប្រភពព័ត៌មានពីសមត្ថកិច្ចបានបង្ហើបអោយដឹងថាករណីនេះទំនងជាករណីចាក់សម្លាប់នៅក្នុងទឹកដីខេត្តផ្សេងហើយយកសពមកទម្លាក់ចោលក្នុងខេត្តកណ្ដាល។បច្ចុប្បន្នសមត្ថកិច្ចជំនាញកំពុងពិនិត្យនិងធ្វើកោសល្យវិច័យដើម្បីកសាងសំណុំរឿងស្រាវជ្រាវរកជនសង្ស័យយកមកចាត់ការតាមផ្លូវច្បាប់ ៕
