កណ្តាល ÷ បុរសម្នាក់រួមដំណើរជាមួយនិងព្រូ បានបើករថយន្តធុនធំដឹកផ្លែស្រការនាគ ចុះពីលើស្ពានព្រែកសំរោង ក្នុងល្បឿនយ៉ាងលឿនជ្រុលទៅបុ.កពីក្រោយរថយន្តធុនធំ មិនចាំម៉ាករួចបន្តទៅបុករបាំងថ្ម បា.ក់២កង់ និងរបងសាលារៀនរងការខូចខាតមួយចំនួន។
ហេតុការណ៍គ្រោះថ្នាក់ចរាចរណ៍នេះដែរ បានកើតឡើងកាលពីវេលាម៉ោង ១និង៣០នាទីរសៀល ថ្ងៃទី២៣ ខែកញ្ញា ឆ្នាំ២០២១ ស្ថិតនៅចំណុចគល់ស្ពានព្រែកសំរោង ក្រុងតាខ្មៅ ខេត្តកណ្តាល។យោងតាមប្រភពព័ត៌មានពីពលរដ្ឋនៅកន្លែងកើតហេតុ បានប្រាប់ឱ្យដឹងថា មុនកើតហេតុ គេបានឃើញបុរសម្នាក់រួមដំណើរ ជាមួយនិងព្រូម្នាក់ទៀត បានបើករថយន្តធុនធំដឹកផ្លែស្រការនាគមួយគ្រឿង ក្បាលពណ៌សពាក់ផ្លាកលេខបាត់ដំបង 3A-1476 បើកចុះពីលើស្ពានព្រែកសំរោង ក្នុងទិសដៅពីកើតមកលិចក្នុងល្បឿនលឿន ខ្វះការប្រុងប្រយ័ត្ន មកដល់ចំណុចកើតហេតុជាប់និងគល់ស្ពានខាងលិច បានជ្រុលចង្កូតទៅបុ.កពីក្រោយរថយន្តធុនធំមួយគ្រឿង នៅពីមុខមិនចាំម៉ាករងការខូចខាត រួចបន្តល្បឿនទៅបុ.ករបាំងថ្មបាក់២កង់ និងរបងសាលារៀនរងការខូចខាតមួយចំនួន ចំណែករថយន្តបង្កវិញ រងការខូចខាតខ្ទេ.ចមួយកំណាត់មុខទាំងស្រុង។ សំណាងល្អនៅក្នុងហេតុការណ៍គ្រោះថ្នាក់ចរាចរណ៍មួយនេះ មិនបង្កឲ្យមាននរណាម្នាក់ រងរបួសគ្រោះថ្នាក់នោះទេ រងការខូចខាតតែរថយន្ដរបាំងថ្មពុះចែកទ្រូងផ្លូវ និងរបងសាលារៀនតែប៉ុណ្ណោះ។
ក្រោយកើតហេតុខាងលើ សមត្ថកិច្ចមូលដ្ឋានសហការ ជាមួយនឹងផ្នែកជំនាញចរាចរណ៍ ចុះមកដល់រួចក៏ធ្វើការវាស់វែង ហៅរថយន្តស្ទូចមកស្ទូចយករថយន្តបង្កខាងលើ ទៅរក្សាទុកនៅអធិការដ្ឋាននគរបាលក្រុងតាខ្មៅ រង់ចាំការដោះស្រាយនៅពេលក្រោយ៕
