ភ្នំពេញ៖ បុរសជាអ្នករត់កង់បីម្នាក់ បានដាច់ចិត្តលោតទឹកសម្លាប់ខ្លួនពីលើស្ពានជ្រោយចង្វាចាស់ទាំង មិនដឹងមូលហេតុបង្កឲ្យមានការភ្ញាក់ផ្អើលកាលពីវេលាម៉ោង៤និង៣០នាទីទៀបភ្លឺថ្ងៃទី៦ ខែសីហា ឆ្នាំ២០២១ នៅចំណុចពាក់ស្ពានជ្រោយចង្វាចាស់ ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ។
បើតាមប្រភពព័ត៌មានពីបុរសអ្នកបើកម៉ូតូកង់បីម្នាក់ដែលឃើញហេតុការណ៍នេះផ្ទាល់បានឲ្យដឹងថា មុនពេលកើតហេតុ ខណៈពេលដែលគាត់បើកម៉ូតូកង់បីឥណ្ឌាឡើងលើស្ពានជ្រោយចង្វារចាស់ ក្នុងទិសដៅពីលិចទៅកើត លុះមកដល់ពាក់កណ្ដាលស្ពាន ក៏ប្រទះឃើញបុរសរងគ្រោះ មានអាយុជិត៤០ឆ្នាំ ស្លៀកខោខ្មៅជើងវែង និងពាក់អាវក្រណាត់ដៃវែង ពណ៌ស ឈរនៅក្បែរម៉ូតូ កង់បីឥណ្ឌាមួយគ្រឿង ពណ៌ស ពាក់ស្លាកលេខ ភ្នំពេញ 1HZ-5832 ។ ដោយមានការសង្ស័យគាត់បានឈប់ម៉ូតូកង់បីពីចម្ងាយមើលឃើញបុរសរងគ្រោះឈរមើលឆ្វេងមើលស្តាំ ទាំងទឹកមុខបែបសោកសៅ លុះរំលងបាន៥នាទី ស្រាប់តែបុរសរងគ្រោះរូបនោះសម្រេចចិត្តលោតទឹកតែម្តង ភ្លាមៗនោះរូបគាត់ព្យាយាមរត់ទៅជួយឃាត់ដែរ ប៉ុន្តែមិនអាចទៅជួយឃាត់ទាន់នោះឡើយ ។
ក្រោយកើតហេតុ ម៉ូតូកង់បីមួយគ្រឿង និងស្បែកជើងមួយគូដែលបុរសរងគ្រោះបានបន្សល់ទុកនៅលើស្ពាន ត្រូវបានសមត្ថកិច្ចប៉ុស្តិ៍នគរបាលស្រះចក យកទៅរក្សាទុកបណ្តោះអាសន្ននៅប៉ុស្តិ៍នគរបាល ដើម្បីស្វែងរកក្រុមគ្រួសារសាច់ញាតិរបស់ជនរងគ្រោះទទួលយកទៅវិញ ៕
