កាលីហ្វ័រញ៉ា៖ អណ្តាតភ្លើងក្រហមច្រាលឆ្អៅពាសពេញផ្ទៃមេឃកំពុងលេបត្របាក់ព្រៃឈើដ៏ធំបំផុតនៅក្នុងរដ្ឋកាលីហ្វ័រញ៉ា បានលាយឡំគ្នាជាមួយភ្លើងឆេះព្រៃតូចផ្សេងៗទៀត ដោយរួមទាំងបំផ្លាញផ្ទះសម្បែងប្រជាពលរដ្ឋជាច្រើនខ្នងផង ខណៈក្រុមអ្នកពន្លត់អគ្គីភ័យ កំពុងតស៊ូពន្លត់យ៉ាងស្រស្រាក់ស្រាំ ។ នេះបើតាមសារព័ត៌មាន Reuters នៅថ្ងៃទី២៦ ខែកក្កដា ឆ្នាំ២០២១ ។
ក្រុមមន្ត្រីពន្លត់អគ្គីភ័យបានឲ្យដឹងថា ភ្លើងឆេះព្រៃ Dixie Fire ដែលបានឆាបឆេះតាំងពីថ្ងៃទី១៤ ខែកក្កដាមក បានបំផ្លាញផ្ទះរាប់សិបខ្នង និងហេដ្ឋារចនាសម្ព័ន្ធដទៃ នៅពេលវាបានឆេះផ្សំបញ្ចូលគ្នាជាមួយ ភ្លើងឆេះព្រៃឈ្មោះ Fly Fire ។ បោះទោះបីយ៉ាងណាក្តីព្រៃឈើលើផ្ទៃដី ៧៧២គីឡូម៉ែត្រក្រឡាត្រូវបានភ្លើងឆេះព្រៃលេបត្របាក់ នៅក្នុងតំបន់ Plumas និងតំបន់ Butte ហើយក្រុមអ្នកពន្លត់អគ្គិភ័យទើបតែគ្រប់គ្រងស្ថានការណ៍បានត្រឹមតែ ២១ភាគរយប៉ុណ្ណោះ ។
បើតាមមន្ត្រីពន្លត់អគ្គីភ័យបានអះអាងថា ភ្លើងឆេះព្រៃដ៏សន្ធោសន្ធៅនេះកំពុងគំរាមកំហែងបំផ្លាញផ្ទះរបស់ប្រជាពលរដ្ឋប្រមាណជាង ១០,០០០ ខណៈក្រុមអ្នកពន្លត់អគ្គីភ័យជាងជាង ២,២០០នាក់ កំពុងតស៊ូប្រយុទ្ធជាមួយអណ្ដាតភ្លើងឆេះព្រៃនេះ ៕
