ភ្នំពេញ៖ ប្រមុខរាជរដ្ឋាភិបាលនៃព្រះរាជាណាចក្រកម្ពុជា សម្តេចតេជោ ហ៊ុន សែន បានថ្លែងក្នុងឱកាសទទួលជំនួយវ៉ាក់សាំងបង្ការជំងឺកូវីដ១៩ របស់ជប៉ុន ជំហានដំបូងប្រមាណ៣៣.២ម៉ឺនដូស នៅឯព្រលានយន្តហោះអន្តរជាតិភ្នំពេញ នាយប់ថ្ងៃទី២៣ ខែកក្កដា ឆ្នាំ២០២១ថា ទោះជាស្ថិតក្នុងតម្លៃណាក៏ដោយ កម្ពុជាត្រូវតែខិតខំរកវ៉ាក់សាំងបង្ការជំងឺកូវីដ១៩ ដើម្បីចាក់ជូនប្រជាពលរដ្ឋឱ្យបានជោគជ័យតាមផែនការ ប្រយោជន៍នាំទៅដល់ភាពស៊ាំនៅក្នុងសង្គម និងសង្គ្រោះអាយុជីវិតរបស់ប្រជាពលរដ្ឋ ។
រាជរដ្ឋាភិបាលកម្ពុជា បានដាក់ផែនការចាក់វ៉ាក់សាំងបង្ការជំងឺកូវីដ១៩ ជូនដល់ប្រជាពលរដ្ឋឱ្យបាន១០លាននាក់ ក្នុងរយៈពេល២ឆ្នាំ ប៉ុន្តែទោះជាយ៉ាងនេះក្តី រហូតដល់បច្ចុប្បន្ននេះ ចំនួនវ៉ាក់សាំងដែលកម្ពុជាទទួលបាន កំពុងរំកិលទៅមុនផែនការ។ រហូតដល់ពេលនេះកម្ពុជាទទួលបានវ៉ាក់សាំងជាង ១៧លានដូសហើយ និងចាក់ជូនប្រជាពលរដ្ឋជាង ៦.៤លាននាក់រួចហើយ ដែលស្មើនឹង ៦៤.៥៥% ធៀបនឹងគោលដៅចំនួនប្រជាពលរដ្ឋត្រូវចាក់ប្រមាណ ១០លាននាក់។ ជាមួយគ្នានេះ រាជរដ្ឋាភិបាល ក៏បានបន្ថែមផែនការចាក់វ៉ាក់សាំងដល់កុមារអាយុចម្លោះ១២ឆ្នាំ ដល់១៧ឆ្នាំផងដែរ ដែលយុទ្ធនាការនៃការចាក់វ៉ាក់សាំងដល់កុមារ និងយុវវ័យ ចន្លោះ១២ឆ្នាំដល់១៧ឆ្នាំ នឹងធ្វើឡើងនៅព្រឹកថ្ងៃទី០១ ខែសីហា ឆ្នាំ២០២១ ។]
សម្តេចតេជោនាយករដ្ឋមន្ត្រីបានថ្លែងបញ្ជាក់ថា បើចាក់១២លាននាក់យើងមាន៧៥ភាគរយ បើចាក់១៣លាននាក់ យើងនឹងមានចំនួនដល់ទៅ៨១.២៥ភាគរយ ដូច្នេះយើងនឹងមានភាពស៊ាំក្នុងសហគមន៍នៅសល់តែក្មេងតូចៗ ។ ចំណែកក្មេងតូចៗដែលនៅសេសល់ទាំងនោះ បានទទួលវ៉ាក់សាំង៦មុខការពាររួចទៅហើយ ៕
