ភ្នំពេញ៖ បន្ទាបពីទទួលបានព័ត៌មានបីប្រជាពលរដ្ឋ សមត្ថកិច្ច នៃអធិការដ្ឋាននគរបាលខណ្ឌចម្ការមន កាលពីវេលាម៉ោង ២និង៣០នាទីរំលងអាធ្រាត្រឈានចូលថ្ងៃទី១៦ ខែកក្កដា ឆ្នាំ២០២១ បានធ្វើការ ពួនស្ទាក់ចាប់ឃាត់ខ្លួនក្រុមលួចទាក់ឆ្កែយប់ៗដែលមានគ្នាចំនួន២នាក់ខណៈពេលដែល ពួកគេកំពុងធ្វើសកម្មភាពទាក់ឆ្កែនៅចំណុចខាងក្រោយសាលាបឋមសិក្សាហ៊ុន នាង ខាងត្បូងផ្លូវ៤៣០ សង្កាត់ផ្សារដើមថ្កូវ ខណ្ឌចម្ការមន ។
បើតាមសមត្ថកិច្ចនៃអធិការដ្ឋាននគរបាលខណ្ឌចម្ការមនបានជម្រាបឲ្យដឹងថា ជនសង្ស័យទី១ ឈ្មោះ តាំង វិត ភេទប្រុស អាយុ ៤៣ឆ្នាំ មុខរបរ ទាក់ឆ្កែ ស្នាក់នៅភូមិ៥ (គល់ស្ពាន) សង្កាត់ស្ទឹងមានជ័យ២ ខណ្ឌមានជ័យ និងជនសង្ស័យទី២ ឈ្មោះ ចាន់ វាសនា ភេទប្រុស អាយុ ៣០ឆ្នាំ មុខរបរ ទាក់ឆ្កែ ស្នាក់នៅមិនពិតប្រាកដ ។ ចំពោះសម្ភារៈដែលដកហូតបានរួមមាន ម៉ូតូ១គ្រឿងម៉ាកស្មាស់ ពណ៌ក្រហម ស្លាកលេខ ភ្នំពេញ 1AA-6849 និងសត្វឆ្កែ ១ក្បាល ពណ៌ខ្មៅ ជាវត្ថុតាង ។
បន្ទាប់ពីធ្វើការឃាត់ខ្លួនជនសង្ស័យខាងលើ កម្លាំងសមត្ថកិច្ចបាននាំមកប៉ុស្តិ៍នគរបាលរដ្ឋបាលផ្សារដើមថ្កូវ ដើម្បីកសាងសំណុំរឿងបញ្ជូនមកអធិការដ្ឋានខណ្ឌចម្ការមន និងអនុវត្តបន្តតាមនីតិវិធីច្បាប់ ៕
