ភ្នំពេញ៖ សត្វតោមួយក្បាលដែលត្រូវបានអាជ្ញាធរបានដក់ហូតពីម្ចាស់កាលពីថ្ងៃមុនពេលនេះ ត្រូវបានម្ចាស់តោជាជនជាតិចិន បានយកមកដល់ផ្ទះវិញហើយនៅវេលាម៉ោងប្រមាណ ២ និង៥០នាទីរសៀលថ្ងៃទី០៥ ខែកក្កដា ឆ្នាំ២០២១ បន្ទាប់ពីប្រមុខរាជរដ្ឋាភិបាលនៃព្រះរាជាណាចក្រកម្ពុជា សម្តេចតេជោ ហ៊ុន សែន បានឯកភាពអនុញ្ញាតឲ្យយកមកចិញ្ចឹមវិញប៉ុន្តែត្រូវមានការធានាពីម្ចាស់អំពីសុវត្ថិភាព ។
ពាក់ព័ន្ធនឹងបញ្ហានេះបន្ទាប់ពីបាននាំមកដល់ផ្ទះនៅខណ្ឌបឹងកេងកងវិញនេះ បុរសជនជាតិចិនជាម្ចាស់ ក៏បានរៀបចំធ្វើជារបងដាក់សត្វតោនៅក្នុងផ្ទះ ដើម្បីធានាសុវត្ថិភាពនៃការរស់នៅ តាមការណែនាំរបស់សម្តេចតេជោផងដែរ ។ ទន្ទឹមនឹងនេះម្ចាស់តោបានបញ្ជាក់ថា តោដែលគេឱ្យខ្លួននេះ គឺមិនបានដកធ្មេញ ឬដកក្រចកដូចការលើកឡើងនោះឡើយ។ ប៉ុន្តែបានទទួលស្គាល់ថា ខ្លួនបានកាត់ក្រចកជើងតោ ដើម្បីការពារគ្រោះថ្នាក់ដល់អ្នកចិញ្ចឹម ។
បើទោះបីយ៉ាងណាក្តីម្ចាស់តោបានសម្តែងទឹកចិត្តត្រេកអរជាពន់ពេកនៅពេលបានទទួលការអនុញ្ញាតក្នុងករណីពិសេសពីសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីកម្ពុជា ដើម្បីឲ្យលោកអាចទទួលយកសត្វតោសំណប់ចិត្តដែលខ្លួនបានចិញ្ចឹមតាំងពីតូច អាចមានសិទ្ធចិញ្ចឹមបន្តទៀតបន្ទាប់ពីអាជ្ញាធរដកហូតមួយរយៈពេលខ្លីកន្លងទៅនេះ ៕
សូមជម្រាបថា ពាក់ព័ន្ធនឹងសត្វតោខាងលើនេះកាលពីថ្ងៃទី២៦ ខែមិថុនា ឆ្នាំ២០២១ រដ្ឋបាលព្រៃឈើរាជធានីភ្នំពេញ តាមបញ្ជារបស់ព្រះរាជអាជ្ញាអមសាលាដំបូងរាជធានីភ្នំពេញបានចុះរឹបអូសយកសត្វតោមួយក្បាលនៅផ្ទះលេខ២២ ផ្លូវ៣០៦ សង្កាត់បឹងកេងកង ខណ្ឌបឹងកេងកង រាជធានីភ្នំពេញ តាមបណ្តឹងរបស់អ្នកជិតខាងនិងអ្នកទេសចរណ៍បរទេស ៕
