ភ្នំពេញ៖ លោក ធាម ច័ន្ទពិសិដ្ឋ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ និងលោក សឿ ឡងឌី ជាតំណាងអយ្យការ នៅព្រឹកថ្ងៃទី១ ខែកក្កដាឆ្នាំ២០២១ បានបើកសវនាការជំនុំជម្រះលើជនជាតិចិនចំនួន៣នាក់ ជាប់ចោទពីបទ កំហែងយកមានស្ថានទម្ងន់ទោសដោយសារការប្រើអាវុធ ដោយចាប់ជនរងគ្រោះដាក់ខ្នោះដៃ និងប្រើប្រាស់ឧបករណ៍ឆក់ជំរិតទារប្រាក់ធ្វើឲ្យខូចខាតដោយចេតនា បើករថយន្តបុកបណ្តាលឲ្យខូចខាតរថយន្ត២ គ្រឿង និងបុរបងផ្ទះបណ្តាលឲ្យខូចខាត និងប្រើប្រាស់ឯកសារសាធារណៈក្លែងគឺពាក់ផ្លាកលេខរថយន្តដោគ្មានសិទ្ធិ និងជំរិតទារប្រាក់១០ម៉ឺនដុល្លារ ។
ជនជាតិចិនជាប់ចោទចំនួន៣នាក់នោះរួមមានទី១-ឈ្មោះ ចម ជីងមីង ( ZHAO-JIANMING ) ភេទប្រុស អាយុ ៣៥ឆ្នាំ ជនជាតិចិន ស្នាក់នៅម្ដុំក្រោយក្រសួងការពារជាតិ ទី២-ឈ្មោះ XIAO-ZEAN ភេទប្រុស ជនជាតិចិន អាយុ ៣២ឆ្នាំ កាន់លិខិតឆ្លងដែនលេខ: EA- 2019587 ស្នាក់នៅម្ដុំកោះពេជ្រ មុខរបរមិនពិតប្រាកដ និងទី៣-ឈ្មោះ HU FENGWEN ភេទប្រុស អាយុ ៣១ឆ្នាំ ជនជាតិ ចិន ស្នាក់នៅផ្ទះជួលលេខ១៥ ផ្លូវលេខ៣ សង្កាត់កាកាប ខណ្ឌពោធន៏សែនជ័យ រាជធានីភ្នំពេញ មុខរបររកស៊ីខាងរ៉ែមាស ។ ចំណែកជនរងគ្រោះមានឈ្មោះ Lin Wei xian ភេទប្រុស ជនជាតិចិន អាយុ៣១ឆ្នាំ ស្នាក់នៅ សណ្ឋាគារ ហាយលៀង មីងជូ ផ្ទះលេខ8 ផ្លូវ 278 ភូមិ5 សង្កាត់បឹងកេងកងទី1 ខណ្ឌបឹងកេងកង រាជធានីភ្នំពេញ មុខរបរបុគ្គលិកខារ៉ាអូខេ ។
ពាក់ព័ន្ធនឹងការជំនុំជម្រះនៅសាលាដំបូងរាជធានីភ្នំពេញនេះដែរ ក្រោយពីបញ្ចប់សវនាការសួរដេញដោលលើជនជាប់ចោទរួចរាល់ហើយលោកចៅក្រមសម្រេចកំណត់យកថ្ងៃទី៦ ខែកក្កដាឆ្នាំ២០២១ វេលាម៉ោង៨ព្រឹកដើម្បីធ្វើការប្រកាសសាលក្រម ។
សូមជម្រាបថា ជនជាតិចិនជាប់ចោទខាងលើនេះ ត្រូវបានសមត្ថកិច្ចឃាត់ខ្លួន នៅចំណុចក្នុងបន្ទប់លេខ៩០២ ជាន់ទី៩ សណ្ឋាគារ ហាយហៀងមីងជូ ផ្លូវលេខ២៧៨ ភូមិ៥ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ កាលពីវេលាម៉ោង២១និង២០នាទី ថ្ងៃទី១២ ខែមេសា ឆ្នាំ២០២០ ។ ក្នុងប្រតិបត្តិការនោះសមត្ថកិច្ចដកហូតបានរថយន្ដចំនួន១គ្រឿង ម៉ាក HILUX REVO ពណ៌ស្ករ ( របស់បក្ខពួកជនសង្ស័យរត់គេចខ្លួន) ។ ទូរស័ព្ទចំនួន២គ្រឿង ម៉ាក iPhone 6 ពណ៌ ទឹកមាស, លុយចំនួន៣២៦ដុល្លារ ,បណ្ណ័ពត៌មាន ( CTN TV) , ដំបងឆក់ចំនួន២ និងគ្រាប់ចំនួន១, ប័ណ្ណសម្គាល់រថយន្ដចំនួន១ និងកាតធានាគារចំនួន១ (ATM – ABA BANK) , ខ្នោះដៃចំនួន២, ក្រណាត់ពណ៌ខ្មៅចំនួន៤ ( សម្រាប់គ្របមុខ) (របស់ឈ្មោះ ZHAO JIANMING)។ ទូរស័ព្ទចំនួន២ គ្រឿង ម៉ាក IPhone 6 ពណ៌ ខ្មៅ និងស , លុយដុល្លាចំនួន ១៣ដុល្លារនិងប្រាក់រៀលចំនួន៤២០០រៀល, លិខិតឆ្លងដែនចំនួន១ លេខ EA 2019587 , Power Bank ពណ៌សរ ម៉ាកRomoss, កូនសោរមួយចង្កោម, និងកាបូបខ្មៅចំនួន១ ( ជារបស់ឈ្មោះ XIAO ZEAN) ។ ទូរស័ព្ទចំនួន ១គ្រឿង ម៉ាកIPhone X ពណ៌ ទឹកប្រាក់ ៕
