ឥណ្ឌា៖ ក្រុមបុរសជាឃាតករចំនួន៥នាក់ នៅក្នុងប្រទេសឥណ្ឌា បានក្លែងបន្លំខ្លួនធ្វើជាគ្រូពេទ្យជួរមុខ ប្រឆាំងកូវីដ-១៩ ដើម្បីលាក់សាកសពបុរសម្នាក់ដែលពួកគេបានសម្លាប់ ក្នុងការប៉ុនប៉ងដើម្បីបន្លំសាកសពជនរងគ្រោះថាជាអ្នកជំងឺកូវីដ១៩ និងយកទៅបូជា ។ នេះបើយោងតាមសារព័ត៌មាន Today Online ដែលបានចេញផ្សាយកាលពីពេលថ្មីៗកន្លងទៅនេះ ។
ប្រភពខាងលើដដែលនេះបានឲ្យដឹងថា បុរសរងគ្រោះដែលត្រូវបានក្រុមឃាតករសម្លាប់នេះ បានជំពាក់បំណុលក្មេងទំនើងចំនួន៤លានរូពីដែលស្មើជាង៥ម៉ឺនដុល្លារ ហើយត្រូវបានក្រុមក្មេងទំនើងទាំងនេះ អញ្ជើញឲ្យចូលរួមពិធីជប់លៀងមួយ ។ ប៉ុន្តែបើទោះបីយ៉ាងណាក្តីពាក់នឹងការស្លាប់របស់ជនរងគ្រោះខាងលើនេះប៉ូលិសបាននិយាយថាបុរសនោះបានថប់ដង្ហើម ។ បន្ទាប់មកក្រុមក្មេងទំនើងទាំង ៥ នាក់នេះ បានពាក់ឈុតសម្លៀកបំពាក់គ្រូពេទ្យជូរមុខ (PPE) និងដាក់សាកសពនៅក្នុងកាបូបរុំសាកសព ដើម្បីចៀសវាងការចាប់បាន។ បន្ទាប់មក ពួកគេបានចុះបញ្ជីបុរសស្លាប់ក្រោមឈ្មោះមិនពិត និងបានបូជាសាកសពនៅឯកន្លែងមួយនៅភាគខាងជើងនៃទីក្រុងអាហ្គរ៉ា។
បើតាមលោក Muniraj G. ស្នងការប៉ូលិសក្នុងតំបន់ បានប្រាប់ថាដើម្បីចៀសវាងការចាប់ខ្លួន ពួកគេបានពាក់ឈុតសម្លៀកបំពាក់ PPE និងបានប្រើកាបូបសម្រាប់វេចខ្ចប់ និងដឹកសាកសពទៅកន្លែងបូជាសព ។ បន្ទាប់មកបុរសម្នាក់ក្នុងចំណោមបុរសទាំងនោះត្រូវបានចាប់ខ្លួនដោយសារមានអ្នកលួចផ្តល់ព័ត៌មានឲ្យសមត្ថកិច្ចហើយនៅទីបំផុត ជនជាប់ចោទទាំង៥នាក់ បានសារភាពចំពោះបទឧក្រិដ្ឋកម្មរបស់ពួកគេ ៕
