ថៃ៖ ចោរចិត្តសឿងចំនួន២នាក់ប្រដាប់ដោយអាវុធបានចូលប្លន់ហាងមាសដ៏ធំ និងល្បីឈ្មោះមួយកន្លែង នៅកណ្តាលក្រុងឈៀងរ៉ៃ ប្រទេសថៃ ទាំងកណ្តាលថ្ងៃ ប្រមូលយកខ្សែកមាស គិតជាទឹកប្រាក់ជាង ៣ លានបាត បើគិតជាប្រាក់ដុល្លារប្រមាណចំនួន ១០ម៉ឺនដុល្លារហើយនាំគ្នាជិះម៉ូតូគេចខ្លួនដោយសុវត្ថិភាព ដែលបានកើតឡើងកាលពីពេលថ្មីៗកន្លងទៅនេះ ។
បើតាមលោកវរសេនីយ៍ទោ Passakorn Sukha ប៉ូលីសស៊ើបផ្នែកអង្កេត នៃស្នងការដ្ឋាននគរបាលស្រុក Muang បាននិយាយថា មានបុរស២នាក់ ជិះម៉ូតូធំ១គ្រឿង បានប្រើប្រាស់អាវុធ ចូលប្លន់ហាងមាសដែលមានយីហោឈ្មោះថា Yaowarat Sinthawee ស្ថិតនៅផ្ទះលេខ៨៨ ផ្លូវលេខ៤ ស្រុក Mueang ដោយបានបាញ់គំរាមម្ចាស់ហាងចំនួន២គ្រាប់ មុនពេលប្រមូលយកគ្រឿងអលង្កការមាសមានទម្ងន់ ១១៤ បាត ដែលមានតម្លៃជាង ៣លានបាត រួចឡើងម៉ូតូជិះគេចខ្លួនបាត់ស្រមោលតែម្តង ។ ជាមួយគ្នានេះនៅកន្លែងកើតហេតុ ប៉ូលីសបានរកឃើញសំបកគ្រាប់កាំភ្លើង 9 mm ចំនួន ២ គ្រាប់ នៅមុខហាង ហើយពួកគេក៏បានយកវីដេអូកាមេរ៉ាសុវត្ថិភាពរបស់ហាង និងក៏ដូចវីដេអូនៃបណ្តាហាងផ្សេងៗទៀតនៅក្បែរនោះ ដើម្បីជាជំនួយសម្រាប់ប៉ូលីសប្រើ ក្នុងការតាមដានមុខសញ្ញាចោរវ័យក្មេងទាំងពីរ ។
លោកវរសេនីយ៍ទោ Passakorn Sukha បានបញ្ជាក់ថា សម្រាប់គ្រឿងអលង្ការដែលបានបាត់បង់រួមាន៖ ទី១-ខ្សែកមាសទម្ងន់៣salungចំនួន២០ខ្សែ ទី២-ខ្សែកមាសទម្ងន់២បាតចំនួន១០ខ្សែ ទី៣-ខ្សែកមាសទម្ងន់៣បាតចំនួន៤ខ្សែ ទី៤-ខ្សែកមាសទម្ងន់៦សាឡុង៣ខ្សែ ទី៥-ខ្សែដៃមាសទម្ងន់៣បាតចំនួន៤ ខ្សែ ទី៦-ខ្សែដៃមាសទម្ងន់២បាតចំនួន១០ខ្សែ ទី៧-ខ្សែដៃមាសទម្ងន់២salungចំនួន៩ខ្សែ ទី៨-ខ្សែដៃមាសទម្ងន់១បាតចំនួន៣ខ្សែ និង៩-ខ្សែកមាសទម្ងន់១បាត២៥ខ្សែ ។ សរុបទាំងអស់ចំនួន៨៦ខ្សែ ,ទម្ងន់ ១១៤បាតមានតម្លៃ៣.០៤៩.៥០០បាត ៕
