បាត់ដំបង៖ ករណីដែលមិននឹកស្មានមួយបានកើតឡើង ខណៈដែលស្ត្រីម្នាក់កំពុងជិះម៉ូតូសណ្តោងរ៉ឺម៉កលក់បន្លែ ផ្លែឈើ និងត្រីសាច់តាមភូមិ ចៃដន្យមានសត្វឆ្កែជាច្រើនក្បាលដេញខាំគ្នា ហើយរត់មកបុករ៉ឺម៉កបណ្តាលឲ្យក្រឡាប់សង្កត់ពីលើស្លាប់យ៉ាងអាណោចអាធ័ម កាលពីថ្ងៃទី២០ ខែមិថុនា ឆ្នាំ ២០២១ នៅត្រង់ចំណុចក្រុមទី៤ ក្នុងភូមិចុងសំណាយ ឃុំជ្រៃ ស្រុកមោងឫស្សី ខេត្តបាត់ដំបង ។
បើតាមសមត្ថកិច្ចមូលដ្ឋានបានឲ្យដឹងថា ស្ត្រីរងគ្រោះខាងលើមានឈ្មោះញឹម សុភឿន អាយុ៣៨ឆ្នាំ រស់នៅភូមិស្ទឹងថ្មី ឃុំតាលាស់ ស្រុកមោងឫស្សី មុខរបរលក់បន្លែ ត្រីសាច់ និងផ្លែឈើចល័តតាមភូមិ ។
ប្រភពដដែលនេះបានឲ្យដឹងបន្តថា មុនកើតហេតុស្ត្រីរងគ្រោះបានជិះម៉ូតូលក់បន្លែ ផ្លែឈើ ដូចសព្វដង លុះដល់ចំណុចខាងលើ មានសត្វឆ្កែមួយហ្វួងដេញខាំគ្នាពេញដងផ្លូវហើយក៏រត់មកបុករ៉ឺម៉ករបស់គាត់ពេញទំហឹងធ្វើឲ្យដួលក្រឡាប់រ៉ឺម៉កសង្កត់លើស្ត្រីរងគ្រោះបណ្តាលឲ្យរបួសធ្ងន់ធ្ងរហើយក៏បានស្លាប់តែម្តង ។
ភ្លាមៗនោះបន្ទាប់ពីកើតហេតុសមត្ថកិច្ចជំនាញបានចុះទៅពិនិត្យទីកន្លែងកើតហេតុ និងប្រមូលព័ត៌មានពីអ្នកភូមិដែលបានឃើញហេតុការណ៍នោះ ។ បន្ទាប់ពីពិនិត្យយ៉ាងយកចិត្តទុកដាក់សមកិច្ចបានសន្និដ្ឋានថា ស្ត្រីរងគ្រោះពិតជាស្លាប់ដោយសារសត្វឆ្កែជាច្រើនក្បាលបានខាំគ្នាហើយរត់បុករ៉ឺម៉កគាត់បណ្តាលឲ្យក្រឡាប់សង្កត់ប្រាកដមែនរួចសមត្ថកិច្ចក៏បានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណី ៕
