ញូដេលី៖ បន្ទាប់ពីប្រទេសឥណ្ឌាបានទទួលរងនូវសោកនាដកម្មនៃការឆ្លងកាត់នូវរលកនៃជំងឺកូវីដ-១៩កន្លងទៅយ៉ាងគំហុកកាលពីពេលកន្លងទៅ ពេលនេះអត្រានៃការឆ្លងថ្មីៗមានការថយចុះគួរកត់សម្គាលធ្វើឲ្យប្រទេសមួយនេះមានសង្ឃឹមងើបឡើងវីញពីការលិចលង់ក្នុងជំងឺមួយនេះ រួមនឹងការពន្លឿននៃការចាក់វ៉ាក់សាំងដល់យុវជនទាំងអស់ ដោយឥតគិតថ្លៃ ។
នេះបើយោងតាមអ្នកជំនាញផ្នែកសុខភាពសហគមន៍ លោក Rajib Dasgupta បញ្ជាក់ប្រាប់ឲ្យដឹងនៅថ្ងៃទី២១ ខែមិថុនាម្សិលម៉ិញនេះថា«ការចាក់វ៉ាក់សាំង ត្រូវគេរំពឹងថានឹងបង្កើនល្បឿនជាថ្មីនាពេលឥឡូវនេះ ការចាក់វ៉ាក់សាំងប្រចាំថ្ងៃបានកើនឡើងក្នុងរយៈពេលមួយសប្តាហ៍មុន ហើយត្រូវរំពឹងថា នឹងកើនឡើងបន្ថែមទៀត» ។
កាលពីខែឧសភាកន្លងទៅរដ្ឋាភិបាលឥណ្ឌា បានពង្រីកបន្ថែមការចាក់វ៉ាក់សាំងជូនដល់មនុស្សពេញវ័យទាំងអស់ ដែលមានអាយុក្រោម៤៥ឆ្នាំដែលរដ្ឋបាលរដ្ឋនីមួយៗ និងមន្ទីរពេទ្យឯកជន ត្រូវទទួលបន្ទុករកទិញវ៉ាក់សាំងដោយខ្លួនឯង សម្រាប់ចាក់ជូនពួកគេ ដែលនាំឱ្យមានភាពច្របូកច្របល់ និងកង្វះខាតការផ្គត់ផ្គង់។ ប៉ុន្តែក្រោយមក រដ្ឋាភិបាលសហព័ន្ធនៅទីក្រុងញូដេលី បានប្រកាសវិញថា ខ្លួននឹងជាអ្នកទទួលបន្ទុកទិញវ៉ាក់សាំង៧៥ភាគរយ និងចែកចាយទៅកាន់រដ្ឋនានា ដើម្បីចាក់ជូនដល់ប្រជាជនដោយឥតគិតថ្លៃ ខណៈ២៥ភាគរយទៀត គឺទុកឲ្យមន្ទីរពេទ្យឯកជនដដែល ។
សូមជម្រាបថា បើគិតមកដល់ពេលនេះឥណ្ឌា បានចាក់វ៉ាក់សាំងជូនដល់ប្រជាជនរបស់ខ្លួនចំនួន ២៧៥លានដូស ក្នុងនោះត្រឹមតែ ៤ភាគរយប៉ុណ្ណោះនៃប្រជាជនសរុប ដែលបានចាក់វ៉ាក់សាំងគ្រប់ដូស ។ រដ្ឋាភិបាលឥណ្ឌាមានគោលបំណងចាក់វ៉ាក់សាំងជូន ដល់មនុស្សពេញវ័យទាំងអស់នៅក្នុងប្រទេស ដែលមានចំនួនជិត១.១ពាន់លាននាក់ ឲ្យបាននៅចុងឆ្នាំ២០២១ខាងមុខ ៕
