ញូដេលី៖ បើទោះបីជាប្រទេសឥណ្ឌាដែលជាប្រទេសមួយរងគ្រោះធ្ងន់ខ្លាំងជាងគេលើពិភពលោក ដោយសារជំងឺ កូវីដ-១៩ ក្តីប៉ុន្តែពេលនេះ ហាក់មើលឃើញក្តីសង្ឃឹមវិលត្រឡប់មករកភាពល្អប្រសើរ ឡើងវិញហើយបន្ទាប់ពីអត្រាឆ្លងថ្មីមានការថយចុះខ្លាំង ។ ជាងស្តែងនៅថ្ងៃទី១៦ ខែមិថុនា ឆ្នាំ២០២១ នេះក្រសួងសុខាភិបាលឥណ្ឌាបានបង្ហាញករណីឆ្លងថ្មីៗចំនួន ៦២,២២៤ករណីបន្ថែមទៀត ក្នុងរយៈពេល ២៤ម៉ោងចុងក្រោយនេះ ដែលនាំឱ្យចំនួនករណីឆ្លងសរុប នៅទូទាំងប្រទេស កើនឡើងដល់ ២៩,៦៣៣,១០៥ករណី ។
ក្នុងរយៈពេលដូចគ្នានេះក្រសួងសុខាភិបាលឥណ្ឌាបានឲ្យដឹងថា អ្នកជំងឺកូវីដ-១៩ចំនួន ២,៥៤២នាក់បន្ថែមទៀតស្លាប់ ដែលនាំឲ្យចំនួនអ្នកស្លាប់សរុបនៅទូទាំងប្រទេសឥណ្ឌាមានការកើនឡើងដល់ ៣៧៩,៥៧៣នាក់ ខណៈអ្នកជំងឺសរុបចំនួន ២៨,៣៨៨,១០០នាក់បានជាសះស្បើយ ។ ចំណែកការចាក់វ៉ាក់សាំងបង្កាជំងឺដ៏កាចសាហាវនេះ ឥណ្ឌាទើបតែសម្រេចបានជិត២៦២លានដូស ។
បើគិតមកដល់ពេលនេះមានរយៈពេលជាងមួយសប្តាហ៍ហើយ ដែលប្រទេសឥណ្ឌា បានប្រកាសពីការរកឃើញចំនួនអ្នកឆ្លងថ្មីៗក្រោម១០ម៉ឺនករណី ដែលមានការធ្លាក់ចុះនូវអត្រាឆ្លងយ៉ាងខ្លាំង ធ្វើឲ្យ ប្រទេសអាស៊ីខាងត្បូងមួយនេះហាក់មានក្តីសង្ឃឹមវិញ បើប្រៀបធៀបកាលពីឧសភាកន្លងទៅករណីឆ្លងថ្មីក្នុងមួយថ្ងៃហក់ឡើងរហូតដល់ជាង ៤០០,០០០ករណីឯណោះ ។ បើទោះបីអត្រាឆ្លង បានធ្លាក់ចុះក្តី ប៉ុន្តែនៅតែជាប្រទេសដែលប្រឈមខ្លាំងជាងគេផងដែរ បើប្រៀបធៀបនឹងប្រទេសផ្សេង ៗទៀតនៅលើពិភពលោក ៕
