ញូដេលី៖ អ្នកស្លាប់ថ្មីៗដោយសារជំងឺ COVID-19 នៅប្រទេសឥណ្ឌាចំនួន ៣,៩២១នាក់ ដែលនាំឱ្យចំនួនអ្នកស្លាប់សរុបនៅទូទាំងប្រទេស កើនឡើងដល់ ៣៧៤,៣០៥នាក់ ខណៈអ្នកជំងឺសរុបចំនួន ២៨,១៦២,៩៤៧នាក់ បានជាសះស្បើយឡើងវិញ ។ នេះបើយោងតាមក្រសួងសុខាភិបាលឥណ្ឌាបានចេញរបាយការណ៍នៅថ្ងៃទី១៤ ខែមិថុនាម្សិលម៉ិញនេះ ។
បើទោះបីយ៉ាងណាក្តីប្រភពខាងលើនេះបានបញ្ជាក់អំពីការកត់សម្គាល់ឃើញការធ្លាក់ចុះខ្លាំងនៃការឆ្លងជំងឺកូវីដ-១៩ក្នុងរយៈពេលមួយសប្តាហ៍ចុងក្រោយនេះដែលករណីឆ្លងថ្មីៗនៅថ្ងៃម្សិលមិញនេះមានចំនួនត្រឹមតែ៧០,៤២១ករណីបន្ថែមទៀតតែប៉ុណ្ណោះ ដែលនាំឲ្យចំនួនករណីឆ្លងសរុបនៅទូទាំងប្រទេស កើនឡើងដល់ ២៩,៥១០,៤១០នាក់ ។
សូមជម្រាបថា ហាងលក់ទំនិញ និងភោជនីយដ្ឋានទាំងអស់ ត្រូវបានអនុញ្ញាតឱ្យបើកដំណើរការឡើងវិញនៅតំបន់រដ្ឋធានី ញូដេលី ចាប់ពីថ្ងៃចន្ទនេះតទៅ ដោយសារចំនួនករណីឆ្លងប្រចាំថ្ងៃបានធ្លាក់ចុះយ៉ាងខ្លាំង ក្នុងរយៈពេលប៉ុន្មានសប្តាហ៍កន្លងមកនេះ។ ប៉ុន្តែសាលារៀន មហាវិទ្យាល័យ ស្ថាប័នអប់រំផ្សេងទៀត កន្លែងហែលទឹក និងកន្លែងហាត់ប្រាណ នៅតែបន្តបិទទ្វារដដែល ៕
