ភ្នំពេញ៖ មហាជនអ្នកលេងហ្វេសប៊ុកប្រាកដជាបានស្គាល់ហើយ ក្មេងប្រុសកម្សត់ម្នាក់ ដែលល្បីពេញបណ្តាញសង្គមកាលពីពេលមុន ដែលគេហៅជាទូទៅថា អាហុង ៗ ពេលនេះបានស្លាប់បាត់បង់ជីវិតលាចាកលោកនេះទៅហើយ ។ នេះបើយោងតាម គណនីហ្វេសប៊ុកឈ្មោះ Zear Tong ដែលបានបង្ហោះនៅថ្ងៃទី១១ ខែមិថុនា ឆ្នាំ២០២១នេះ ។
ប្រភពខាងលើនេះបានបង្ហោះរូបភាពអមដោយសារថា «អាហុងទៅហើយយ Hmmm អស់កម្មហើយយ សង្ឃឹមថាជាតិក្រោយឯងនឹងល្អជាងជាតិនេះ ដែលអ្នកទាំងអស់គ្នាសួរថាអាហុង ស្លាប់ដោយសារមូលហេតុអ្វី លឺរពួកម៉ាប្រាប់ថាវាតោងឡានដឹកម៉ាស៊ីនភ្លើង ហើយលត់ចុះពីឡាន ត្រូវកន្ទុយក្រោយអូសហើយកិន»។
បន្ទាប់ពីឃើញការបង្ហោះសារនេះភ្លាមគេសង្កេតឃើញអ្នកលេងហ្វេសប៊ុកនាំគ្នាសែចែកចាយបន្តពេញបណ្តាញសង្គម ក្នុងនោះក៏មានអ្នកចូលខំម៉ិន(comment)បញ្ចេញមតិសម្តែងការអាណិតអាសូរចំពោះក្មេងក្សត់នេះយ៉ាងព្រោងព្រាត ដោយសារក្មេងកម្សត់នេះហាក់បាត់ដំណឹងយូរហើយប៉ុន្តែនៅពេលលេចឮដំណឹងសារថ្មី បែជាដំណឹងអកុសលបែបនេះ ។
ក្នុងចំណោមការខំម៉ិនពីមហាជននោះមានគណនីហ្វេសបុកមួយឈ្មោះSam Reasey ខំម៉ិនថា«អ្នកកំសត់ ខ្វះភាពកក់ក្ដៅ ចុងក្រោយស្លាប់ដោយកំសត់ទៀត សង្ឃឹមថាជាតិក្រោយអ្នកទទួលបានការស្រលាញ់ភាពកក់ក្តៅពេញបរិបូរណ៍ សូមអោយឌួងវិញ្ញាណក្ខន្ឋរបស់គាត់ទៅកាន់សុគតិភព »។ ចំណែកគណនីហ្វេសប៊ុកឈ្មោះ Maa Taa ខំម៉ិនផងដែរថា «នៅជាតិនេះគ្នាអត់ដែរស្គាល់ពាក្យថាកក់ក្ដៅពីឪពុកម្ដាយម្ដេចមិនដែលស្គាល់ពាក្យថាក្តីស្រឡាញ់ម្ដេចនោះទេសង្ឃឹមថាជាតិក្រោយគ្នាស្គាល់នៅពាក្យថាក្ដីស្រឡាញ់ ការថែទាំ ហើយមិនដើរត្រាច់ចរតែលតោលតែឯងបែបនេះទៀត » ។
សូមជម្រាបថា កុមារារងគ្រោះខាងលើនេះ ត្រូវបានអ្នកលេងបណ្ដាញសង្គមហ្វេសប៊ុកស្គាល់យ៉ាងច្បាស់ថា ជាក្មេងអនាថា និងត្រូវបានគេដឹងថា ធ្លាប់មានអ្នកបោកក្មេងនេះប្រើប្រាស់ឲ្យដើរលួចទ្រព្យសម្បត្តិអ្នកដទៃទៀតផងដែរកាលពីពេលកន្លងមក ៕
