ភ្នំពេញ ៖ មានករណីគ្រោះថ្នាក់ចរាចរណ៍មួយបង្កឡើងដោយនារីរូបស្រស់២នាក់ បានបើករថយន្តម៉ែកសឺដេសស៊េរីទំនើបមួយគ្រឿង ក្នុងលឿនមិនប្រយ័ត្នបណ្តាលឲ្យជ្រុលចង្កូត ទៅបុករបងហ៊ុព័ទ្ធកន្លែងការដ្ឋាន កំពុងតែជួសជុលផ្លូវពេញទំហឹង បណ្តាលឲ្យរថយន្តរងការខូចខាត ផ្នែកខាងមុខយ៉ាងដំណំ ប៉ុន្តែមិនបង្កគ្រោះថ្នាក់ដល់មនុស្សនឡើយ ដែលហេតុការណ៍នេះបានកើតឡើងនៅវេលាម៉ោង១១ និង ២០នាទីយប់ថ្ងៃទី ៤ ខែមិថុនា ឆ្នាំ២០២១ ស្ថិតនៅតាមបណ្ដោយផ្លូវ៥៩២ កែងនឹងផ្លូវ ៣៣៧ក្នុងសង្កាត់បឹងកក់ទី ១ ខណ្ឌទួលគោក រាជធានីភ្នំពេញ ។
បើតាមប្រជាពលរដ្ឋនៅកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ គេបានឃើញរថយន្តស៊េរីទំនើបមួយគ្រឿង ម៉ាកម៉ែកសឺដេស ពណ៌សពាក់ផ្លាកលេខ កម្ពុជាM.SAM99 បើកបរដោយស្រ្តី២នាក់ ធ្វើដំណើរតាមបណ្ដោយផ្លូវ៣៣៧កែងនឹងផ្លូវ៥៩២ ក្នុងទិសដៅពីត្បូងមកជើងក្នុងល្បឿនលឿន ខណៈមកដល់ចំណុចកើតហេតុ បានជ្រុលចង្កូតទៅបុករបង ដាក់ព័ទ្ធជុំវិញការដ្ឋានជួសជុលផ្លូវ ពេញទំហឹងបណ្តាលឲ្យរបងបាក់អស់ចំនួន ២ផ្ទាំង រងការខូចខាត ចំណែកឯម្ចាស់រថយន្តវិញ ក៏បានឡើងលើរថយន្តមួយគ្រឿងទៀត រត់គេចខ្លួនបាត់ស្រមោល ។
ភ្លាមៗនោះបន្ទាប់ពីទទួលបានព័ត៌មាន សមត្ថកិច្ចមូលដ្ឋាន សហការជាមួយនឹងខាងជំនាញចរាចរណ៍ ចុះមកដល់ក៏ធ្វើការវាស់វែង និងធ្វើកំណត់ហេតុយករថយន្តបង្កខាងលើ ទៅរក្សាទុកនៅអធិការដ្ឋាននគរបាលខណ្ឌទួលគោក រង់ចាំដោះស្រាយនៅពេលក្រោយ៕
