កីឡាជាតិ៖ ក្លឹបបាល់ទាត់អង្គរថាយហ្គឺរ ដែលជាសមាជិកក្របខ័ណ្ឌលីគកំពូលកម្ពុជា និងកំពុងបង្ហាញលេខធ្លោខ្លាំងនៅដើមរដូវកាល ២០២១ ដោយលើកំពូលតារាងបណ្តោះអាសន្ន បានប្រកាសតែងតាំងលោក Kota Miyagi ជាជំនួយការគ្រូបង្វឹកជាផ្លូវការ កាលពីថ្ងៃទី៣ ខែមិថុនា ឆ្នាំ២០២១។
យោងតាមសេចក្តីប្រកាសព័ត៌មានរបស់ក្លិបបាល់ទាត់អង្គរថាយហ្គឹរបញ្ជាក់ថា លោក Kota Miyagi ត្រូវបានចាត់តាំងជាគ្រូបង្វឹកឈុតធំ សម្រាប់រដូវកាល ២០២១ នេះ។ លោក Kota គឺជាគ្រូបង្វឹកមួយរូបដែលកាន់អជ្ញាបណ្ឌ Japan Football Association(JFA) C License។ ស្ថិតក្នុងវ័យ២៧ឆ្នាំ គ្រូជំនួយរូបនេះធ្លាប់ជាកីឡាករលេងឲ្យក្រុមលីគលំដាប់ទី៣ ជប៉ុន FC Ryukyu (ដែលបច្ចុប្បន្នស្ថិតក្នុងលីគលំដាប់ទី ២) ពីឆ្នាំ២០១៦ ដល់ ២០១៧។ ក្រោយមកលោកក៏ត្រូវបានតែងតាំងជាគ្រូបង្វឹកឈុត U12 របស់ FC Ryukyu ក្នុងឆ្នាំ២០១៧ និងបន្តក្លាយជាគ្រូជំនួយឈុត U18 នៅក្នុងឆ្នាំ២០១៨។ នៅក្នុងឆ្នាំ ២០១៨ ដដែល លោកបានមកប្រទេសកម្ពុជាតាមរយៈអង្ការ JICA ដែលបានធ្វើជាជំនួយការគ្រូបង្វឹកក្រុមជម្រើសខេត្ត ក្រចេះ ឈុត U15 និង U18 រហូតដល់ឆ្នាំ២០២១។ ក្រៅពីភាសាជប៉ុន និងអង់គ្លេស លោក Kota Miyagi ក៏អាចប្រើប្រាស់ភាសា ខ្មែរ បានផងដែរ។
ក្លិបបាល់ទាត់អង្គរថាយហ្គឺរបានសម្ដែងក្ដីរីករាយចំពោះការចូលរួមរបស់ Kota Miyagi និងសង្ឃឹមថារូបលោកនឹងសហការជាមួយគ្រូបង្គោល Oriol Segura ក្នុងការដឹកនាំក្រុមខ្លាទឹកក្រូចឲ្យទទួលបានជោគជ័យនៅក្នុងរដូវកាល ២០២១នេះ។
សូមរំឭកថា ក្រុមអង្គរថាយហ្គឺ ដែលដឹកនាំដោយជនជាតិជប៉ុន លោក Akihiro Kato កំពុងឈរនៅចំណាត់ថ្នាក់លេខ១ លើកំពូលតារាងបណ្តោះអាសន្ននៃក្របខ័ណ្ឌលីគកំពូលកម្ពុជារដូវកាល ២០២១នេះ ដោយឆ្លងកាត់៥ប្រកួត ឈ្នះ៤ប្រកួត និងស្មើ១ប្រកួត មាន១៣ពិន្ទុ៕
