ព្រះសីហនុ៖មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងដោយសារយុវជនម្នាក់ភាគីខាងម៉ូតូបានស្លាប់ភ្លាមៗនៅកន្លែងកើតហេតុបន្ទាប់ពីវ៉ាជែងរថយន្តធំមិនផុតហើយបានបុកប៉ះជាមួយរថយន្តធំមួយគ្រឿង ផ្សេងទៀតដែលបើកបញ្ច្រាសទិសគ្នានៅលើផ្លូវជាតិលេខ៤ចន្លោះគីឡូម៉ែត្រ២០៥-២០៦ ស្ថិតនៅក្នុងភូមិស្មាច់ដែងឃុំរាមស្រុកព្រៃនប់ កាលពីថ្ងៃទី០២ ខែមិថុនា ឆ្នាំ ២០២១ ។
សមត្ថកិច្ចបានប្រាប់ឲ្យដឹងថា ជនរងគ្រោះដល់ជីវិតឈ្មោះ អាន់ គុណ អាយុ២២ ឆ្នាំមានទីលំនៅ ភូមិស្មាច់ដែងឃុំរាម ស្រុកព្រៃនប់ ។ ជនរងគ្រោះជិះ ម៉ូតូពណ៌ ខ្មៅពាក់ផ្លាកលេខ ភ្នំពេញ១HH-០២០៤ មានទិសដៅខេត្តព្រះសីហនុ – ភ្នំពេញ ។ មកដល់ ចំណុចកើតហេតុបាន វ៉ាជែងជ្រុលទៅបុករថយន្តធុនធំដឹក កុងតឺន័រក្បាលរថយន្ត ពាក់ ផ្លាកលេខភ្នំពេញ ៣C-២៤១៧ បើកបរដោយឈ្មោះ សួន រួម ភេទប្រុស អាយុ២៥ឆ្នាំ មានទីលំនៅខេត្តកំពង់ស្ពឺ ។ ចំណែកអ្នកបើកបររថយន្តឈ្មោះ សួន រួម រងរបួសមធ្យម បានបញ្ជូនទៅព្យាបាលនៅគ្លីនិកភូមិរាម ។
បន្ទាប់ពីកើតហេតុសមត្ថកិច្ចបានយកវត្ថុតាងរថយន្ត និងម៉ូតូមករក្សាទុកនៅអធិការដ្ឋាននគរបាលស្រុកព្រៃនប់ ដើម្បីដោះស្រាយបន្តតាមនីតិវិធីនៅពេលក្រោយ ៕
