ភ្នំពេញ៖ មហាជនសម្តែងអារម្មណ៍ខ្លោចចិត្ត និងក្តុកក្តួលចិត្តខ្លាំងណាស់ ពេលឃើញដូនចាស់ម្នាក់ដែលត្រូវបានគេថតបង្ហោះនៅក្នុងបណ្តាញសង្គមហ្វេសប៊ុក ដោយខំតស៊ូលក់ផ្កាដល់កណ្តាលអាធ្រាតដើម្បីយកប្រាក់មកចិញ្ចឹមជីវិត លើការចំណាយសម្រាប់ជីវភាពប្រចាំថ្ងៃ បើទោះលំបាក់យ៉ាងណាក្តីមិនលើកដៃសុំលុយពីអ្នកដទៃនោះឡើយ ។
ក្នុងគណនីហ្វេសប៊ុកឈ្មោះ Seyha Aum Make បង្ហោះរូបភាព និងអមដោយសារថា «ម្តាយគេម្តាយយើង សរសើរគាត់ណាស់សុខចិត្តលក់ផ្កាទាំងយប់ក៏មិនសុំអោយគេជួយ បងប្អូនណាដែលជិះកាត់កោះពេជ្រជួយទិញផ្កាលោកយាយផង» ។ ក្នុងសារនៃគណនី ហ្វេសប៊ុកនេះមិនបានបញ្ជាក់អំពីអាសយដ្ឋានស្នាក់នៅរបស់លោកយាយ និងសាច់ញាតិ នោះទេ ។
បន្ទាប់ពីឃើញសកម្មភាពដូនចាស់ដែលខំតស៊ូលក់ផ្ការហូតដល់យប់ជ្រៅយ៉ាងនេះ មហាជនអ្នកលេងបណ្តាញសង្គមហ្វេសប៊ុក ខ្លះស្ទើរស្រក់ទឹកភ្នែកទៅហើយ ដោយ សារអាណិតដល់ដូនចាស់ខ្លាំងពេក ណាមួយខ្លួនចាស់ផង ហើយក៍មិនដឹងថាកូនចៅ ណាមើលថែទៀត ។ គេសង្កេតឃើញមហាជនមួយចំនួនបានព្យាយាមសួររកកន្លែង ស្នាក់នៅរបស់លោកយាយខាងលើផងដែរ ។ បើទោះយ៉ាងណាក្តីគេសង្ឃឹមថានឹងមាន មហាជនអាណិតដល់ដូន ចាស់ជួយឧបត្ថម្ភតាមលទ្ធភាព ៕
