កំពង់ស្ពឺ៖ មានករណីគ្រោះថ្នាក់ចរាចរណ៍មួយបានកើតឡើង ដោយសាររថយន្តដឹកកម្មករ-កម្មការនីមួយគ្រឿង រ៉េចង្កូតទៅបុកដើមឈើ បណ្ដាលឲ្យមានមនុស្សចំនួន២១នាក់ បានរងរបួស ដែលបានកើតឡើងកាលពីវេលាម៉ោង៦ព្រឹក ថ្ងៃទី២ ខែមិថុនា ឆ្នាំ២០២១ នៅលើផ្លូវលំ ត្រង់ចំណុចភូមិច្បារច្រុះ ឃុំក្រាំងចេក ស្រុកឧដុង្គ ។
បើតាមសមត្ថកិច្ចខេត្តកំពង់ស្ពឺ បានឲ្យដឹងថា រថយន្តនេះម៉ាកហ៊ីយ៉ាន់ដាយ ពណ៌ស គ្មានស្លាកលេខ បើកបរដោយឈ្មោះ ថុល ឆៃ ភេទប្រុស អាយុ២២ឆ្នាំ នៅភូមិត្បែង ឃុំរុងរឿង ស្រុកថ្ពង ដោយធ្វើដំណើរពីទិសខាងជើងទៅទិសខាងត្បូង លុះដល់ចំណុចខាងលើ បានរ៉េចង្កូតទៅបុកដើមឈើ។ យ៉ាងណាក៏ដោយ សមត្ថកិច្ចមិនទាន់អាចបញ្ជាក់ អំពីមូលហេតុជាក់លាក់ នៃគ្រោះថ្នាក់ចរាចរណ៍នេះនៅឡើយទេ។
ពាក់ព័ន្ធនឹងករណីគ្រោះថ្នាក់ចរាចរណ៍នេះសមត្ថកិច្ចបានឲ្យដឹងថា គ្រោះថ្នាក់ខាងលើនេះបានបណ្ដាលឲ្យកម្មករ-កម្មការនី ចំនួន២១នាក់រងរបួស ដោយក្នុងនោះរបួសធ្ងន់ចំនួន៦នាក់។ បច្ចុប្បន្នជនរងគ្រោះ ត្រូវបានបញ្ជូនទៅសង្គ្រោះ នៅមន្ទីរពេទ្យឯកជន និងមន្ទីរពេទ្យបង្អែកស្រុកឧដុង្គ ៕
