ភ្នំពេញ៖ ជនជាតិចិនម្នាក់បើករថយន្តម៉ាកអូឌី ក្នុងល្បឿនលឿន បានបត់ស្តាំបម្រុងចូលកន្លែងស្នាក់នៅស្រាប់តែវ៉ាក់អើ ជាមួយម៉ូតូ បានបួងចង្កូតជ្រុលទៅបុកចូល ជញ្ជាំងកញ្ចក់សណ្ឋាគារតាយ ម៉េង បណ្តាលឲ្យបាក់ជញ្ជាំងអស់មួយផ្ទាំងសំណាងល្អ មិនគ្រោះថ្នាក់ដល់មនុស្ស កាលពីវេលាម៉ោង៩និង២០ នាទីយប់ថ្ងៃទី ២៨ ខែឧសភា ឆ្នាំ២០២១ ស្ថិតនៅតាមបណ្ដោយផ្លូវព្រះមុនីវង្ស ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
បើតាមសន្តិសុខម្នាក់នៅកន្លែងកើតហេតុបានឲ្យដឹងថា នៅមុនពេលកើតហេតុគាត់បានឃើញរថយន្តម៉ាកអូឌី មួយគ្រឿងពណ៌សពាក់ផ្លាកលេខភ្នំពេញ 2-AJ 1799 បើកបរដោយបុរសជនជាតិចិនធ្វើដំណើរតាមបណ្តោយផ្លូវព្រះមុនីវង្ស ក្នុងទិសដៅ ពីជើងមកត្បូងក្នុងល្បឿនលឿនខណៈមកដល់ចំណុចកើតហេតុជាប់សណ្ឋាគារតាយ ម៉េងបានបត់ស្តាំគោលបំណងចូលទៅកន្លែងស្នាក់នៅស្រាប់តែវ៉ាក់អើ ជាមួយម៉ូតូក៏បួង ចង្កូតគេចទៅបុកចូលសណ្ឋាគារតាយ ម៉េង បាក់កញ្ចក់មួយផ្ទាំង និងសម្ភារៈមួយចំនួន ។ ចំណែកតៃកុងរថយន្តនៅកន្លែងកើតហេតុរង់ចាំការដោះស្រាយជាមួយម្ចាស់ សណ្ឋាគារ ។
បន្ទាប់ពីកើតហេតុសមត្ថកិច្ចមូលដ្ឋានបានចុះមកដល់ និងបានពិនិត្យជំវិញកន្លែងកើតហេតុក៏ឲ្យភាគីបង្កសម្របសម្រួលជាមួយតំណាងម្ចាស់សណ្ឋាគារដោយភាគីបង្ក មិនចង់វែងឆ្ងាយក៏ព្រមសងក្នុងការជួសជុលទាំងអស់បញ្ចប់រឿងនៅកន្លែងកើតហេតុតែម្តងទៅ ៕
