ភ្នំពេញ៖ ជនសង្ស័យម្នាក់ត្រូវបានសមត្ថកិច្ចនគរបាលខណ្ឌឬស្សីកែវកែវឃាត់ខ្លួនពាក់ព័ន្ធករណីគាស់ទ្វាផ្ទះលួចទ្រព្យសម្បត្តិកាលពីវេលាម៉ោង ០៥និង ៣០នាទី ថ្ងៃទី ២៨ខែឧសភាឆ្នាំ ២០២១ នៅចំណុចផ្ទះជួលផ្លូវបេតុង ក្រុមទី៦ភូមិ៣សង្កាត់ច្រាំងចំរេះ១ ខណ្ឌឫស្សីកែវ ។
បើតាមអធិការនគរបាលខណ្ឌឫស្សីកែវ លោក ហ៊ាង ថារ៉េត បានឲ្យដឹងថា ជនសង្ស័យឈ្មោះ ពៅ ខេមរិនភេទប្រុសអាយុ២៩ឆ្នាំមុខរបរកម្មក ស្នាក់នៅផ្ទះជួលផ្លូវបេតុងភូមិ៣សង្កាត់ច្រាំងចំរេះ១ខណ្ឌឫស្សីកែវ (មានសារធាតុញៀន)។ ចំណែកជនរងគ្រោះមាន ឈ្មោះ អ៊ូ ហាន ភេទប្រុស អាយុ ៥០ឆ្នាំ មុខរបរ លក់ដូរ មានទីលំនៅ ផ្ទះជួលផ្លវ បេតុង ក្រុមទី ៦ភូមិ៣សង្កាត់ច្រាំងចំរេះ១ខណ្ឌឫស្សីកែវ ។
លោកអធិការបានបន្តថានៅថ្ងៃកើតហេតុ ជនសង្ស័យដើរមកផ្ទះជនរងគ្រោះគោលបំណងលួចទ្រព្យសម្បត្តិពេលមកដល់ពុំមានមនុស្ស ដោយឃើញសភាពស្ងប់ស្ងាតទើបជនសង្ស័យបានយកដែកសសៃលួសកែឆ្នៃមកឆ្កឹះសោទ្វារផ្ទះចូលទៅលួចសំភារះរួចបានគេចខ្លួនមកផ្ទះជួល។លុះដល់ម៉ោង៨ព្រឹកឡើងថ្ងៃ២៨ខែឧសភាឆ្នាំ២០២១ ត្រូវបានសមត្ថកិច្ចមកឃាត់ខ្លួនជនសង្ស័យ នៅផ្ទះជួលក្រុម៦ភូមិ៣សង្កាត់ច្រាំងចំរេះ១និងនាំយកមកប៉ុស្តិ៍ច្រាំងចំរេះ១សាកសួរ ។
ចំពោះសម្ភារ:ដកហូតមានរួមមាន លោហះធាតុពណ៍លឿងទុំចំនួន១ខ្សែក លោហះធាតុពណ៍លឿងទុំចំនួន១ខ្សែដៃ បណ្តោងដាំត្បូងចំនួន១ ទូរសព្ទ១គ្រឿងម៉ាកHiyaពណ៍ខ្មៅគ្មានស៊ីម និងដែកលួសសសៃកែឆ្នៃចំនួន១ ។
បច្ចុប្បន្ន ជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕
