អន្តរជាតិ៖ ក្រុមហ៊ុនអាជីវកម្មថ្មី (Startup) ចំនួន 2 ដែលមានឈ្មោះល្បីនៅក្នុងប្រទេសឥណ្ឌូនេស៊ីបានប្រកាសពីផែនការរួមបញ្ចូលគ្នាដើម្បីអាចបង្កើតបានទៅជាក្រុមហ៊ុនបច្ចេកវិទ្យាថ្មី និងធំបំផុតនៅក្នុងប្រទេសឥណ្ឌូនេស៊ី ក៏ដូចជាប្រចាំតំបន់អាស៊ីអាគ្នេយ៍ ដោយមានតម្លៃសរុបប្រមាណជិត 20ពាន់លានដុល្លារ។ នេះបើយោងតាមការបញ្ជាក់របស់ប្រធានគ្រប់គ្រងរបស់ Tokopedia លោក Patrick Cao ដែលនឹងក្លាយទៅជាប្រធានគ្រប់គ្រងរបស់ GoTo Group នៅពេលឆាប់ៗខាងមុខនេះ។
ក្រុមហ៊ុន Gojeck ដែលមានផ្តល់ជាកម្មវិធីកក់មធ្យោបាយធ្វើដំណើរ និង ក្រុមហ៊ុន Tokopedia ដែលផ្តល់ជាកម្មវិធីទិញទំនិញគ្រប់ប្រភេទលើបណ្តាញអនឡាញប្រចាំនៅប្រទេសឥណ្ឌូនេស៊ីបានឈានទៅដល់កិច្ចព្រមព្រៀងក្នុងការរួបរួមគ្នាបង្កើតទៅជាក្រុមហ៊ុនបច្ចេកវិទ្យាថ្មីដ៏ធំមួយប្រចាំប្រទេស និងក្នុងតំបន់អាស៊ីអាគ្នេយ៍ផងដែរដោយដាក់ឈ្មោះថា GoTo Group។
ជាមួយនឹងកិច្ចសហការរវាងក្រុមហ៊ុនចំនួន២ រួមបញ្ចូលគ្នាតែមួយនៅពេលនេះ GoTo Group ទទួលបានការគាំទ្រយ៉ាងខ្លាំងពីសំណាក់ក្រុមហ៊ុនបច្ចេកវិទ្យាធំៗដទៃទៀតនៅលើពិភពលោក ដូចជា ក្រុមហ៊ុន Alibaba, Tencent, Facebook, Google រួមជាមួយនឹងក្រុមហ៊ុន Softbank ផងដែរ។
គួររំលឹកថា ក្រុមហ៊ុន Gojeck មានមូលដ្ឋាននៅក្នុងទីក្រុង Jakarta និងបានចាប់ផ្តើមអាជីវកម្មលើកដំបូងរបស់ខ្លួនតាមរយៈការបង្កើត និងដាក់ឲ្យប្រើកម្មវិធីកក់ម៉ូតូឌុបតាមអនឡាញ ហើយបច្ចុប្បន្នបានបន្តអាជីវកម្មរបស់ខ្លួនទៅជាសេវាកម្មដឹកជញ្ជូនទំនិញស្ទើរគ្រប់ប្រភេទ ហើយកម្មវិធីរនេះក៏ត្រូវបានប្រើប្រាស់យ៉ាងទូលាយសម្រាប់ការទូទាត់សាច់ប្រាក់តាមអនឡាញ ខណៈដែល Tokopedia ជាវេបសាយទិញទំនិញតាមអនឡាញដ៏ធំ ដែលត្រូវបានបង្កើតឡើងតាំងពីឆ្នាំ 2009 ដោយអាចអនុញ្ញាតឲ្យអ្នកប្រើប្រាស់មានជម្រើសក្នុងការទិញទំនិញជាមួយនឹងហាងទំនិញគ្រប់ទីកន្លែងនៅក្នុងប្រទេសឥណ្ឌូនេស៊ី។
ក្រោយការបញ្ចូលគ្នាក្លាយខ្លួនទៅជាក្រុមហ៊ុនជំនាញបច្ចេកវិទ្យាដ៏ធំប្រចាំប្រទេស និងក្នុងតំបន់អាស៊ីអាគ្នេយ៍ GoTo Group ត្រូវបានគេជឿជាក់ថាអាចមានទំហំស្មើទៅនឹង 2 ភាគរយនៃ G D P របស់ប្រទេសឥណ្ឌូនេស៊ី ហើយក្រុមហ៊ុននេះក៏គ្រោងបង្កើតការងារឲ្យបានកាន់តែច្រើនបន្ថែមទៀតសម្រាប់ពលរដ្ឋរបស់ខ្លួន៕
