ស្ទឹងត្រែង៖ យុវជនម្នាក់បានរងរបួសជាទម្ងន់ដោយសារបើកម៉ូតូក្នុងល្បឿនលឿន ហើយបុកឆ្កែឱ្យងាប់លើកំណាត់ផ្លូវជាតិលេខ៧ចំណុចគីឡូម៉ែត្រលេខ១២ ស្ថិតក្នុងភូមិ រាជានុកូលសង្កាត់ស្ទឹងត្រែង ក្រុង-ខេត្តស្ទឹងត្រែង កាលពីវេលាម៉ោងជាង ២ រសៀលថ្ងៃទី១៣ ខែឧសភាឆ្នាំ ២០២១ ។
គ្រូពេទ្យខេត្តស្ទឹងត្រែង បានប្រាប់ឲ្យដឹងថា មានអ្នកជំងឺម្នាក់រងរបួស ធ្ងន់ដោយសារជួបគ្រោះថ្នាក់ចរាចរណ៍ ។ ជនរងគ្រោះឈ្មោះលេះ គ្រីយ៉ាអាយុ ១៩ ឆ្នាំ ខ្មែរ អ៊ីស្លាម រស់នៅភូមិ – ឃុំអូរឫស្សី កណ្ដាល ស្រុកសៀមបូក ខេត្តស្ទឹងត្រែង ។
បើតាមប្រភពពីប្រជាពលរដ្ឋនៅក្បែរ កន្លែងកើតហេតុ បានប្រាប់ឲ្យដឹងថា ជនរងគ្រោះខាងលើ ជិះម៉ូតូធំតែម្នាក់ឯងក្នុងទិសដៅពីអូរពងមាន់ចូលទីរួមខេត្តស្ទឹងត្រែង ។ លុះមកដល់ត្រង់ចំណុចគីឡូម៉ែត្រលេខ១២ ក៏បានបុកជាមួយឆ្កែញីមួយក្បាល បណ្ដាលឲ្យសត្វឆ្កែនោះ ងាប់នៅនឹងកន្លែងកើតហេតុ ។
ភ្លាមៗនោះ ជនរងគ្រោះត្រូវបានគេជួយដឹកទៅ សង្គ្រោះបន្ទាន់ នៅមន្ទីរពេទ្យបង្អែក ខេត្តស្ទឹងត្រែង ។ ម៉ូតូដែលជនរងគ្រោះជិះទុក នៅក្បែរកន្លែងកើតហេតុ ដោយមិនទាន់មានសមត្ថកិច្ចចុះទៅធ្វើកំណត់ហេតុភ្លាមៗនៅឡើយទេ៕
