កំពង់ឆ្នាំ៖ ពិតជារឿងមួយដែលមហាជនបានដឹងហើយ សម្តែងការហួសចិត្តជាខ្លាំង បន្ទាប់ពីបានដឹងមូលហេតុអំពីជាករណីភ្លើងឆេះផ្ទះដ៏រន្ធត់នៅស្រុកបរិបូណ៌ ខេត្តកំពង់ឆ្នាំ គឺប្តីជាឃាត់ករ អ្នកដុតផ្ទះសម្លាប់ប្រពន្ធកូនអស់មួយគ្រួសារ ។
បើតាមចម្លើយសារភាពរបស់បុរសជាប្តី ឈ្មោះនុន សារ៉េត អាយុ៣៨ឆ្នាំ បានបញ្ជាក់នៅចំពោះមុខមត្ថកិច្ចជំនាញ រួមជាមួយអង្គភាពការពារកុមារ (CPU)នៅថ្ងៃទី១២ ខែឧសភា ឆ្នាំ២០២១នេះថា ខ្លួនជាឃាតករសម្លាប់ និងដុតផ្ទះឲ្យស្លាប់កូន និងប្រពន្ធ៦នាក់រួមទាង កូនក្នុងផ្ទៃប្រពន្ធមួយផង ដោយសារភ្លើងកំហឹងនៃការទំនាស់ពាក្យសម្តីនឹងគ្នា ។
សូមជម្រាបថា ករណីអគ្គីភ័យដែលបង្កឡើងដោយឃាតករជាប្តីខាងលើនេះកើតឡើង កាលពីថ្ងៃទី៩ ខែឧសភា ឆ្នាំ២០២១ នៅចំណុចអ្នកតារាជ ភូមិដើមជ្រៃ ឃុំខុនរ៉ង ស្រុកបរិបូណ៍ ខេត្តកំពង់ឆ្នាំ បណ្តាលឲ្យក្មេង៤នាក់មានអាយុ៩ឆ្នាំម្នាក់ ៧ឆ្នាំ២នាក់ និង៣ឆ្នាំម្នាក់ ព្រមទាំងម្ដាយរបស់ពួកគេដែលមានផ្ទៃពោះ ស្លាប់គំនរភ្នក់ភ្លើង យ៉ាងសន្ធោស ន្ធៅ គួរឲ្យអាណោចអាធ័ម ៕
