បាត់ដំបង៖ មន្ត្រីកងរាជអាវុធហត្ថខេត្តបាត់ដំបង នៅសៀសថ្ងៃទី០៨ ខែឧសភា ឆ្នាំ២០២១ បានធ្វើការឃាត់ខ្លួនកូនប្រុសអតីតមន្ត្រីយោធាម្នាក់រក្សាទុកនូវអាវុធជាតិផ្ទុះ ដែលជាកេរ្តដំណែលរបស់ឪពុកដែលនៅសេសសល់តាំងពីសម័យសង្គ្រាម ហើយមិនព្រមប្រគល់ជូនសមត្ថកិច្ច ក្រោយពីគាត់ទទួលមរណភាព ដែលស្ថិតនៅក្នុងភូមិចំការឬស្សី សង្កាត់ព្រែកព្រះស្ដេច ក្រុងបាត់សំបង ។
បើតាមប្រសាសន៍របស់លោក សូ ឌី ប្រធានមន្ទីរយុត្តិធម៌ នៃបញ្ជាការកងរាជអាវុធហត្ថខេត្ត បានឲ្យដឹងថា ជនសង្ស័យដែលត្រូវឃាត់ខ្លួនខាងលើឈ្មោះ សាំ សុខបញ្ញាវ័ន ភេទប្រុស អាយុ២៥ឆ្នាំ មានមុខរបរជាងដែក រស់នៅភូមិ សង្កាត់ខាងលើ ជាមួយនឹងអាវុធជាតិផ្ទុះ រួមទាំងសម្ភារៈយោធាជាច្រើន ដែលបានរក្សាទុកនៅក្នុងផ្ទះខ្លួនរហូតមកដល់សព្វថ្ងៃនេះ ដោយមិនព្រមប្រគល់ជូនសមត្ថកិច្ច ឬអាជ្ញាធរឡើត ។
វត្ថុតាងដែលបានដកហូតរួមមាន កាំភ្លើង M16 ចំនួន១ដើម មានបង់ចំនួន១០ និងមានគ្រាប់ចំនួន២៤២គ្រាប់ បង់ AK47 ចំនួន០៤ មានគ្រាប់ចំនួន៦៤គ្រាប់ និងមានគ្រាប់ខ្ចិបចំនួន៧គ្រាប់ បង់ម៉ាត់តាយ៉ែតចំនួន២ និងមានគ្រាប់ចំនួន៩គ្រាប់ មីនចំនួន៤គ្រាប់ ទូសសៀចំនួន០១ ស្បែកជើងកវែងយោធាចំនួន០២គួ ឯកសណ្ឋានយោធាប៉ារ៉ាចំនួន០១កំប្លេ និងអាវភ្លៀងយោធាចំនួន០១ ។
បើតាមចម្លើយរបស់ជនសង្ស័យរូបនេះបានឱ្យដឹងថា ខ្លួនពិតជាបានរក្សាទុកនូវសម្ភារៈយោធាទាំងនេះមែន ដែលជាកេរដំណែលសេសសល់ពីឪពុកខ្លួនដែលជាអតីតមន្ត្រីយោធា តែគាត់បានស្លាប់ហើយ ។ ប៉ុន្តែបុរសរូបនេះមិនដែលប្រើប្រាស់អាវុធ ឬឯកសណ្ឌានយោធាទាំងនេះ តែខ្លួនរក្សាទុក ព្រោះតែចង់លក់យកលុយប៉ុណ្ណោះ។
ធានមន្ទីរយុត្តិធម៌ នៃបញ្ជាការកងរាជអាវុធហត្ថខេត្ត បានបញ្ជាក់ថា ពេលនេះ លោកមេបញ្ជាការ កងរាជអាវុធហត្ថខេត្ត បានបញ្ជាឲ្យមន្ត្រីជំនាញ សួរនាំជនសង្ស័យ ដើម្បីកសាងសំណុំរឿងបញ្ជូនទៅសាលាដំបូងខេត្តហើយ រីឯគ្រាប់យុទ្ធភ័ណ្ឌមួយចំនួន និងត្រូវប្រគល់ជួនមន្ត្រីស៊ីម៉ាក់យកទៅកំទេចចោល៕
