ប្រទេសម៉ាលី ៖ ពិតជាកំពូលស្រ្តីដ៏អស្ចារ្យ និងមិនមានស្រ្តីណាអាចពរពោះបានឡើយ ដោយស្ត្រីជនជាតិម៉ាលីម្នាក់ បានសម្រាលកូនភ្លោះចំនួន៩នាក់ កាលពីថ្ងៃអង្គារ ហើយពួកគេទាំងអស់មាន «សុខភាពល្អ»។
ស្ត្រីវ័យ២៥ឆ្នាំ បានក្លាយជាម្តាយ របស់កូនៗ ចំនួន៩នាក់ ក្នុងថ្ងៃតែមួយ នាងរស់នៅភាគខាងជើង ប្រទេសម៉ាលី ដែលជាប្រទេសដ៏ក្រីក្រមួយនៅអាហ្វ្រិកខាងលិចត្រូវបានរដ្ឋាភិបាលបញ្ជូនទៅប្រទេសម៉ារ៉ុកកាលពីថ្ងៃទី៣០ ខែមីនាបន្ទាប់ពីក្រុមគ្រូពេទ្យបាននិយាយថាពួកគេត្រូវការការថែទាំពិសេស។
ក្រសួងសុខាភិបាលម៉ាលីបាននិយាយនៅក្នុងសេចក្តីថ្លែងការណ៍មួយថា ដំបូងឡើយការពិនិត្យអេកូទាំងនៅក្នុងប្រទេសម៉ាលីនិងនៅម៉ារ៉ុកបង្ហាញថាគាត់មានកូនភ្លោះតែ៧នាក់ប៉ុណ្ណោះ។
ម្តាយវ័យ២៥ឆ្នាំរូបនេះ សម្រាលបានកូនស្រីចំនួន៥នាក់និងកូនប្រុសចំនួន៤នាក់ដោយធ្វើការវះកាត់នៅក្នុងប្រទេសម៉ារ៉ុក៕
