កីឡា៖ កីឡាករក្លឹបបាល់ទាត់លំដាប់ពិភពលោក Tottenham Hotspur កាលពីថ្ងៃទី៣ ឧសភា ឆ្នាំ២០២១កន្លងទៅនេះ បានចូលប្រកួតក្របខណ្ឌ Premier League ទល់ក្រុម Sheffield United ដោយទទួលបានជ័យជម្នះក្នុងលទ្ធផល ៤-០ ដែលមានអ្នកទស្សនារាប់លាននាក់ពីជុំវិញពិភពលោក។
ជាការកត់សម្គាល់ នៅក្នុងកម្មវិធីប្រកួតនោះ កីឡាកររបស់ក្រុមបាល់ទាត់ Tottenham Hotspur ទាំងអស់បានពាក់អាវរចនាយ៉ាងពិសេសដែលមានអក្សរខ្មែរ លើពាក្យថា «ពីកម្ពុជា ដោយ អេ អាយ អេ(AIA)» ដែលនេះ គឺជាមោទកភាពមួយរបស់កម្ពុជានៅលើឆាកអន្តរជាតិ។
សូមបញ្ជាក់ថា អាវរំលេច ជាមួយអក្សរខ្មែរនេះ នឹងត្រូវចុះហត្ថលេខាដោយកីឡាករ Tottenham Hotspur ទាំងអស់ រួចដាក់ដេញថ្លៃលើគេហទំព័រ អ៊ីបេ (eBay) ចាប់ពីថ្ងៃទី៥ ខែឧសភាខាងមុខនេះ ដើម្បីប្រមូលថវិកាជួយដល់អង្គការផ្កាយសមុទ្រកម្ពុជា ដែលជាអង្គការសប្បុរសធម៌ ជួយគាំទ្រដល់កុមារក្រីក្ររាប់ពាន់នាក់នៅកម្ពុជា និងមូលនិធិរបស់ក្លឹបបាល់ទាត់ Tottenham Hotspur។ ភាពជាដៃគូរយៈពេលវែង រវាងក្រុមហ៊ុន អេ អាយ អេ ជាមួយក្លឹបបាល់ទាត់ Tottenham Hotspur គឺដើម្បីជួយប្រជាជននៅទូទាំងតំបន់អាស៊ីប៉ាស៊ីហ្វិកឲ្យមានសុខភាព និងជីវិតកាន់តែប្រសើរ៕
