ខេត្តបន្ទាយមានជ័យ ៖ កម្លាំងនគរបាលវរៈការពារព្រំដែនគោកលេខ៩១១ បានឃាត់មេខ្យល់ម្នាក់ បម្រុងនាំពលករ២នាក់លួចឆ្លងទៅប្រទេសថៃ កាលពីព្រលប់ថ្ងៃទី០៣ ខែឧសភា ស្ថិតក្បែរព្រំដែនស្ថិតភូមិអាងសីឡា ឃុំអូរបីជាន់ ស្រុកអូរជ្រៅ។
លោកវរៈសេនីយ៍ឯក សូរ ចាន់រី មេបញ្ជាការនគរបាលវរៈការពារព្រំដែនគោកលេខ៩១១ បានអោយដឹងថា មេខ្យល់ដែលត្រូវឃាត់ខ្លួនឈ្មោះ សេន រតនា ហៅជីត អាយុ៣១ឆ្នាំ រស់នៅភូមិសាលាខ្មែរ ឃុំអូរបីជាន់ ស្រុកអូរជ្រៅ ចំណែកពលករ២នាក់ ឈ្មោះ វ៉ន ដែន អាយុ២៦ឆ្នាំ និងឈ្មោះ វ៉ាន់ សាល អាយុ២៨ឆ្នាំ ដែលរស់នៅភូមិដំរីលើ ឃុំសឿ ស្រុកមង្គលបូរី។
តាមសំដីពលករខ្មែរ២នាក់ បានអោយដឹងគឺពួកគាត់បម្រុងឆ្លងដែនទៅប្រទេសថៃ ដើម្បីរកការងារធ្វើតាមរយៈមេខ្យល់ឈ្មោះ សេន រតនា ហៅជីត ក្នុងយកតំលៃ៥.០០០បាត ដោយសន្យាជូនដល់កន្លែងធ្វើការងារប្រទេសថៃតែត្រូវបានកម្លាំងសមត្តកិច្ចឃាត់ ។ ក្រោយពេលសាកសួរហើយពលករ២នាក់បញ្ជូនទៅដាក់មណ្ឌលធ្វើចត្តាឡីស័ករយៈពេល១៤ថ្ងៃនិងមេខ្យល់កសាងសំណុំរឿងបញ្ជូនសាលាដំបូងចាត់ការតាមច្បាប់៕
