ខេត្តកណ្តាល ៖ ប្រជាពលរដ្ឋសុំមិនបញ្ចេញឈ្មោះ បានរាយការណ៍ចូលក្នុងផេកស្នងការដ្ឋាននគរបាលខេត្តកណ្ដាល មានខ្លឹមសារថា “បាទ លោកស្នងការ សូមលោកស្នងការជួយចុះទៅមើលនៅភូមិខ្ពបលើ ឃុំខ្ពប ស្រុកស្អាង ខេត្តកណ្តាល នៅផ្សារព្រែកតាជន មានអ្នកចត្តាឡីស័ក១៤ថ្ងៃ ដើរពេញផ្សារ មិនព្រមនៅក្នុងផ្ទះទេ បើលោកស្នងការចង់ដឹងបន្ថែម អាចចុះទៅស៊ើបមើលបាន ឬទៅមណ្ឌលសុខភាពខ្ពប ដោយជួបជាមួយពេទ្យ ឃីស សុឆេង”។
ក្រោយពីទទួលបានព័ត៌មាននេះភ្លាម ដោយមានការចង្អុលបង្ហាញពីក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្ដាល លោកអធិការនគរបាលស្រុកស្អាង បានបញ្ជាទៅប៉ុស្តិ៍នគរបាលរដ្ឋបាលខ្ពប ឲ្យចុះស្រាវជ្រាវករណីខាងលើដែលបងប្អូនប្រជាពលរដ្ឋបានរាយការណ៍មក។
នៅថ្ងៃទី២៦ ខែមេសា ឆ្នាំ២០២១ កម្លាំងប៉ុស្តិ៍នគរបាលរដ្ឋបាលខ្ពប សហការជាមួយក្រុមប្រឹក្សាឃុំ គ្រូពេទ្យមណ្ឌលសុខភាពឃុំ បានចុះធ្វើការអប់រំ ណែនាំអំពីវិធានការសុខាភិបាល ៣កុំ ៣ការពារ និងធ្វើកិច្ចសន្យា ចំពោះក្រុមគ្រួសារដែលកំពុងធ្វើចត្តាឡីស័កនៅផ្ទះ ដូចខាងក្រោម៖ ទី១-ផ្ទះរបស់ឈ្មោះ អេង ផាត ភេទប្រុស អាយុ៥៦ឆ្នាំ មានទីលំនៅភូមិឬស្សីស្រុក ឃុំខ្ពប ស្រុកស្អាង ខេត្តកណ្ដាល។ ទី២-ផ្ទះរបស់ឈ្មោះ កុយ ណារ៉េត ភេទស្រី អាយុ៤៧ឆ្នាំ មានទីលំនៅភូមិឬស្សីស្រុក ឃុំខ្ពប ស្រុកស្អាង ខេត្តកណ្ដាល។ ទី៣-ផ្ទះរបស់ឈ្មោះ ប៊ូ មុខ ភេទប្រុស អាយុ៤០ឆ្នាំ មានទីលំនៅភូមិខ្ពបលើ ឃុំខ្ពប ស្រុកស្អាង ខេត្តកណ្ដាល។ ទី៤-ផ្ទះរបស់ឈ្មោះ ផៃ ថី ភេទប្រុស អាយុ៥៤ឆ្នាំ មានទីលំនៅភូមិបឹងខ្ពប ឃុំខ្ពប ស្រុកស្អាង ខេត្តកណ្ដាល។និង៥-ផ្ទះរបស់ឈ្មោះ ស៊ឹម ស៊ីនឿន ភេទស្រី អាយុ៥៤ឆ្នាំ មានទីលំនៅភូមិខ្ពបលើ ឃុំខ្ពប ស្រុកស្អាង ខេត្តកណ្ដាល។
ចំពោះប្រជាពលរដ្ឋទាំង ០៥នាក់ ខាងលើនេះ អាជ្ញាធរឃុំ បានអប់រំកុំឲ្យដើរចេញទៅខាងក្រៅផ្ទះព្រោះខ្លួនកំពុងនៅធ្វើចត្តាឡីស័ក និងចូលរួមអនុវត្តវិធានការរបស់ក្រសួងសុខាភិបាល៕
