ភ្នំពេញ ៖ បុរសម្នាក់ត្រូវកម្លាំងគណៈបញ្ជាការឯកភាពខណ្ឌចំការមនឃាត់ខ្លួន បន្ទាប់ពីជិះម៉ូតូ មួយគ្រឿង ឆ្លងកាត់គោលដៅបិទខ្ទប់របស់សមត្ថកិច្ច ទាំងមិនមានលិខិតបំពេញបេសកកម្ម កាលពីវេលាម៉ោង១០ និង៥៥នាទីយប់ ថ្ងៃទី២៣ ខែមេសាឆ្នាំ២០២១ ត្រង់ចំណុចស្តុបនាគបាញ់ទឹក តាមបណ្ដោយមហាវិថីសម្តេចសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន។
ខណៈពេលដែលសមត្ថកិច្ចធ្វើការសួរនាំ បុរសរូបនោះបានឆ្លើយរៀបរាប់ថា គាត់ទើបតែជិះចេញពីផ្ទះនៅម្ដុំស្តុបចំការមន បំណងជិះទៅក្រុមហ៊ុនដែលគាត់ធ្វើការម្តុំអាគារ៤២ជាន់ ព្រោះខាងក្រុមហ៊ុនបានទាក់ទងហៅគាត់ឲ្យទៅដោយមានធុរៈសំខាន់ ទើបធ្វើឲ្យគាត់ប្រញាប់ប្រញាល់ភ្លេចពាក់ម៉ាស់ការពារ។
ពេលនោះ ដែលសមត្ថកិច្ចក៏បានសុំមើលកាតការងារ និងលិខិតបំពេញបេសកកម្ម ប៉ុន្ដែបុរសរូបនោះបានឆ្លើយថា គាត់ទើបតែចូលធ្វើការខាងក្រុមហ៊ុន គេមិនទាក់ចេញកាតអោយនោះទេ។ បន្ទាប់មក សមត្ថកិច្ចក៏សូមលេខទូរស័ព្ទខាងក្រុមហ៊ុនពីបុរសរូបនោះ ដើម្បីទាក់ទងទៅសួរនាំ ឲ្យបានដឹងច្បាស់ថា បុរសនោះមានការណ៍ត្រូវទៅបំពេញធុរៈសំខាន់ពិតប្រាកដ ឬគ្រាន់ជាពាក្យដោះសារ។ ប៉ុន្តែខណៈពេលដែលសមត្ថកិច្ចធ្វើការទំនាក់ទំនងតាមលេខទូរស័ព្ទរបស់ក្រុមហ៊ុននោះ មិនចូលទាល់តែសោះ។
ក្រោយពេលកើតហេតុ កម្លាំងគណៈបញ្ជាការឯកភាពខណ្ឌចំការមន ក៏បានសម្រេចធ្វើការដកហូតម៉ូតូរបស់បុរសខាងលើយកទៅរក្សាទុក និងអោយបុរសនោះត្រឡប់ទៅធ្វើចត្តាឡីស័កនៅផ្ទះចំនួន១៤ថ្ងៃ រង់ចាំត្រឡប់មកយកម៉ូតូទៅវិញ៕
